الماتىدا 13 توننادان استام كوكايننىڭ رەكوردتىق پارتياسىن ترانزيتتەۋ ءىسى بويىنشا سوت پروتسەسى باستالدى، دەپ حابارلايدى «ادىرنا» ءتىلشىسى tengrinews.kz-سىلتەمە جاساپ.
سوتتالۋشىلار قاتارىندا شەتەل ازاماتتارى بار. ولارعا ءومىر بويىنا تۇرمە جازاسى بەرىلۋى مۇمكىن. ءىس القابيلەردىڭ قاتىسۋىمەن قارالىپ جاتىر.
ولارعا اسا ءىرى كولەمدە ەسىرتكى تاسىمالداۋ جانە كونتراباندا جاساۋ بويىنشا ايىپ تاعىلعان. ءبىر باپ بويىنشا 7–12 جىلعا، ال ەكىنشىسى بويىنشا 15–20 جىلعا نەمەسە ءومىر بويىنا تۇرمە جازاسى بەرىلۋى مۇمكىن.
سوت الماتى قالاسىنداعى قىلمىستىق ىستەرگە ارنالعان مامانداندىرىلعان ارالىق اۋداندىق سوتتا ءوتىپ جاتىر.
رەكوردتىق كوكاين پارتياسى تۋرالى ۇقك 2025 جىلعى قىركۇيەكتە حابارلاعان. تەرگەۋ دەرەكتەرىنە سايكەس، ەسىرتكى جۇگى قازاقستان ارقىلى ءۇشىنشى ەلدەرگە ترانزيتپەن جەتكىزىلمەك بولعان.
الايدا جۇكتىڭ ناقتى قاي ەلدەن شىققانى رەسمي تۇردە جاريالانباعان. كوكايننىڭ جالپى سالماعى 13 توننا 183 كيلوگرامم بولعان. بۇل – رەسپۋبليكا تاريحىنداعى ەڭ ءىرى ءبىر رەتتىك پارتيا.
الدىن الا ەسەپ بويىنشا، تاركىلەنگەن كوكايننىڭ قارا نارىقتاعى قۇنى شامامەن 2 تريلليون 197 ميلليارد تەڭگەدەن اسادى. سوت پروتسەسى جالعاسۋدا.
