اقش-تا اتىشۋلى قارجىگەر دجەففري ەپشتەينگە تيەسىلى بولعان جەكە ۇشاق قاراۋسىز قالعان اۋەجاي اۋماعىنان تابىلدى، دەپ حابارلايدى "ادىرنا" ۇلتتىق پورتالى Caliber.az باسىلىمىنا سىلتەمە جاساپ.
مالىمەتكە سايكەس، «لوليتا ەكسپرەسس» اتانىپ كەتكەن ۇشاق دجوردجيا شتاتىنداعى برانسۋيك قالاسىندا ورنالاسقان اۆياتسيالىق كومپانيا اۋماعىندا شامامەن ون جىل بويى پايدالانىلماي تۇرعان. The New York Post جاريالاعان اقپاراتقا سايكەس، ۇزىندىعى 40 مەتر بولاتىن Boeing 727 (N908JE) 2016 جىلدان بەرى اۋەگە كوتەرىلمەگەن.
جاريالانعان فوتوسۋرەتتەردەن اۋە كەمەسىنىڭ كورپۋسى مەن ىشكى بولىگى ۋاقىت وتە كەلە ايتارلىقتاي توزعانى بايقالادى. ۇشاق اشىق اسپان استىندا ۇزاق ساقتالعاندىقتان، مەتالل بولىكتەرى كورروزياعا ۇشىراپ، ينتەرەرى بۇلىنگەن. جۋرناليستەر ۇشاق ىشىندەگى «زەڭ ءيىسى مۇڭكىگەن اۋىر اۋا» تۋرالى دا جازعان.
ۇشاق سالونىندا جاتىن بولمە، بىرنەشە دەمالىس ايماقتارى، اس ءۇي جانە جۋىنۋ بولمەلەرى بار. سونىمەن قاتار، سوڭعى پايدالانىلعان كەزەڭنەن قالعان كەيبىر زاتتار دا تابىلعان.
بۇعان دەيىن پروكۋرورلار بۇل ۇشاقتىڭ كامەلەتكە تولماعانداردى زاڭسىز تاسىمالداۋ ءۇشىن پايدالانىلعانىن مالىمدەگەن. ۇشاق بورتىنان تابىلعان زاتتاردىڭ ىشىندە جەكە گيگيەنا قۇرالدارى مەن بالالارعا ارنالعان ونىمدەر بولعانى حابارلاندى.
اقپارات قۇرالدارىنىڭ دەرەگىنشە، ءار جىلدارى بۇل ۇشاقتا ساياساتكەرلەر مەن ىسكەرلىك ورتا وكىلدەرى دە ۇشقان. سوڭعى رەيس 2016 جىلدىڭ شىلدە ايىندا ورىن العان. سودان بەرى اۋە كەمەسى تەحنيكالىق قىزمەت كورسەتىلمەي، ەلەكتر قۋاتىنسىز قالعان.
ساراپشىلاردىڭ پىكىرىنشە، قازىرگى تەحنيكالىق جاعدايىنا بايلانىستى ۇشاقتى قايتا پايدالانۋعا مۇمكىندىك جوق.
