ەلوردا اۋەجايىندا وليمپيادا چەمپيونى ميحايل شايدوروۆ پەن قازاقستاندىق مانەرلەپ سىرعانۋشى سوفيا سامودەلكينانى سالتاناتتى قارسى الۋ ءراسىمى ءوتتى، دەپ حابارلايدى «ادىرنا» ءتىلشىسى.
سپورتشىلاردى قارسى الۋ ءۇشىن اۋەجايعا جۇزدەگەن جانكۇيەر جينالدى. ۇشاق قوناردان شامامەن ءبىر ساعات بۇرىن تەرمينال ەكرانىنان ميحايل شايدوروۆتىڭ وليمپياداداعى جارقىن ساتتەرى كورسەتىلدى. قولدارىنا پلاكات ۇستاعان جانكۇيەرلەر سپورتشىنىڭ ەسىمىن حورمەن ايتىپ، جىلى لەبىزدەرىن ءبىلدىردى. ولاردىڭ اراسىندا پاندا كەيپىندەگى جانكۇيەر دە بولدى.
سالتاناتتى جيىن بارىسىندا سپورتشىلارعا پاتەر كىلتتەرى تابىستالدى. ميحايل شايدوروۆقا مانەرلەپ سىرعاناۋ وداعىنىڭ اتىنان ءۇش بولمەلى پاتەردىڭ سەرتيفيكاتى بەرىلسە، سوفيا سامودەلكيناعا ءبىر بولمەلى پاتەردىڭ سەرتيفيكاتى تاپسىرىلدى. پاتەرلەر سپورتشىلاردىڭ باپكەرلەرىنە دە بەرىلدى.
«مەنى قولداپ جۇرگەن بارشا جانعا وسىنداي كەرەمەت سىيلىقتار ءۇشىن ۇلكەن راقمەت. قولداۋلارىڭىزعا شىن جۇرەكتەن العىس ايتامىن. بۇل – مەن ءۇشىن العا قاراي ءوسىپ، ەلىمىزدىڭ اتىن ودان ءارى اسقاقتاتۋعا كومەكتەسەر زور موتيۆاتسيا. بارشاڭىزعا راقمەت!» – دەدى شايدوروۆ.
ايتا كەتەيىك، بۇعان دەيىن Ulytau Group كومپانياسى وليمپيادا چەمپيونىنا استانادان ءۇش بولمەلى پاتەر سىيلاعان ەدى. سونداي-اق «التىنالماس» كومپانياسى دا شايدوروۆقا الماتى قالاسىنان ەكى بولمەلى پاتەر بەرەتىندەرىن مالىمدەدى.
ەسكە سالايىق، قازاقستاندىق مانەرلەپ سىرعاناۋشى 2026 جىلى يتاليادا وتكەن وليمپيادادا سەنساتسيالىق تۇردە التىن مەدال جەڭىپ العان ەدى. بۇل – ەلىمىزدىڭ مانەرلەپ سىرعاناۋ تاريحىنداعى العاشقى التىن مەدالى جانە قازاقستاننىڭ قىسقى وليمپيادا ويىندارىنداعى ەكىنشى التىن جۇلدەسى. ال سوفيا سامودەلكينا 207.46 ۇپاي جيناپ، جالپى ەسەپتە 10-ورىن الدى.
سۋرەت: sportplustv.kz
