الماتىداعى ۋاقىتشا ۇستاۋ اباقتىسىنان گەنەرال-مايور ءولى كۇيىندە تابىلدى، دەپ حابارلايدى “ادىرنا” ۇلتتىق پورتالى.
18-ءىنشى تەرگەۋ يزولياتورىندا ولار الماتى جانە اقمولا وبلىستارى دپ-نىڭ بۇرىنعى باسشىسى (2009-2016 جج.) - جايلاۋبەك حالىقۇلىنىڭ ءمايىتىن تاپقانى بەلگىلى بولدى. گەنەرال-مايور ءوز-وزىنە قول جۇمسادى دەگەن بولجام بار.
پوليتسەي 23 مامىردا ۇستالدى. ول قىلمىستىق ءىستى توقتاتۋ ماقساتىندا بەلگىلى ءبىر ازاماتتىڭ اقشاسى مەن مۇلكىن الاياقتىق جولمەن الدى دەگەن كۇدىككە ىلىككەن. مالىمەتتەر ناقتىلانىپ جاتىر.
گەنەرال-مايوردىڭ ءولىمىن قىلمىستىق-اتقارۋ جۇيەسى كوميتەتى دە راستادى.
"تاڭعى ساعات 7-لەر شاماسىندا قاماۋعا الىنعان ج.حالىقۇلىن قاراۋىل ينسپەكتورى تاپتى. مەكەمەنىڭ كەزەكشى اۋىسىمى دەرەۋ العاشقى مەديتسينالىق كومەك كورسەتتى. قولدانىلعان شارالارعا قاراماستان، تەرگەۋدەگى ادامدى امان الىپ قالۋ مۇمكىن بولمادى”، دەلىنگەن مالىمدەمەدە.
وقيعا ورنىنا جەدەل-تەرگەۋ توبى، پروكۋراتۋرا وكىلدەرى مەن وبلىستىق ءىىد باسشىلىعى كەلگەنى ناقتىلانۋدا. باسقا ۇستالعاندارمەن اڭگىمە جۇرگىزىلدى. تەكسەرۋ ناتيجەسىندە وعان قاتىستى زاڭسىز ارەكەتتەر فاكتىلەرى انىقتالعان جوق.
قازىرگى ۋاقىتتا ىشكى اۋديت جۇرگىزىلۋدە، ونىڭ ناتيجەلەرى بويىنشا قولدانىستاعى زاڭناماعا سايكەس شارالار قابىلدانادى.
“ادىرنا” ۇلتتىق پورتالى
