1 ناۋرىز – العىس ايتۋ كۇنىنە وراي قاراتال اۋدانىندا جانە تالدىقورعان قالاسىندا «العىس – بىرلىك باستاۋى» اتتى اۋقىمدى مەرەكەلىك ءىس-شارا ءوتتى. بۇل كۇن قوعامداعى سىيلاستىق پەن ريزاشىلىق سەزىمىن ارتتىرۋعا، ەتنوسارالىق كەلىسىمدى نىعايتۋعا جانە جاستاردى ۇلتتىق قۇندىلىقتارعا قۇرمەتپەن تاربيەلەۋگە ارنالعان ەرەكشە شارا بولدى.
ءىس-شارانىڭ العاشقى ءبولىمى قاراتال اۋدانى، باستوبە اۋىلى، «قازاق حالقىنا مىڭ العىس!» مونۋمەنتىندە ۇيىمداستىرىلىپ، سالتاناتتى تۇردە گۇل شوقتارى قويىلدى. بۇل – ەل بىرلىگى مەن تاتۋلىعى جولىندا ەڭبەك ەتكەن تۇلعالارعا قۇرمەت كورسەتۋ بەلگىسى. ءراسىم بارىسىندا قحا ارداگەرلەرى مەن قوعام بەلسەندىلەرى ءسوز سويلەپ، بىرلىك پەن كەلىسىمنىڭ ماڭىزدىلىعىن اتاپ ءوتتى. جەتىسۋ وبلىستىق اقساقالدار كەڭەسىنىڭ توراعاسى كەلەمسەيىت ەرمەك ءابىلماجىنۇلى، كورەي ەتنومادەني بىرلەستىگىنىڭ اقساقالى ۆيكتور يۆانوۆيچ پاك جانە اۋدان اكىمىنىڭ وكىلى دوسىمبەكوۆ ۇلان الديبەكۇلى ءوز قۇتتىقتاۋ سوزدەرىندە ەلدىڭ تۇراقتىلىعى مەن حالىق بىرلىگىنىڭ ماڭىزدىلىعىن ەرەكشە اتاپ ءوتتى.
ەكىنشى ءبولىم «دوستىق ءۇيى» عيماراتىندا ءوتتى. كينەس رەكوردتار كىتابىنىڭ رەداكتورى ب. تاستۇلەكوۆ قۇتتىقتاۋ ءسوز سويلەپ، ۇلتتىق تاعام – قۇرت جاساۋ اكتسياسىنىڭ باستالعانىن جاريالادى. اكتسيا بارىسىندا 20 مينۋت ىشىندە 30 قاتىسۋشى، ءارتۇرلى ەتنوستاردان، 4546 قۇرت ازىرلەپ، بۇل ناتيجە كينەس رەكوردتار كىتابىنا ەنگىزىلدى. جوبا تەك ۇلتتىق تاعامدى دارىپتەپ قانا قويماي، ورتاق ماقساتقا بىرىگىپ جۇمىس ىستەگەن ادامداردىڭ بىرلىگىن كورسەتتى. ەتنومادەني بىرلەستىكتەر مەن ەرىكتىلەر بەلسەندى تۇردە قاتىستى.
سالتاناتتى بولىمدە قر ءانۇرانىن ورىنداعاننان كەيىن قحا ارداگەرلەرى مەن بەلسەندى قاتىسۋشىلار ماراپاتتالدى. سونىمەن قاتار، كونتسەرتتىك باعدارلامادا ەتنومادەني بىرلەستىكتەر ۇلتتىق اندەر مەن بيلەرىن كورسەتە وتىرىپ، كورەرمەندەرگە مەرەكەلىك كوڭىل-كۇي سىيلادى.
مەرەكەلىك ءىس-شارا تەك قاراتال اۋدانىندا عانا ەمەس، تالدىقورعان قالاسى مەن پانفيلوۆ اۋدانىندا دا قايىرىمدىلىق اكتسيالارىمەن جالعاستى. قاتىسۋشىلار قازاقستان حالقى اسسامبلەياسىندا ەڭبەك ەتكەن ارداگەرلەردىڭ ۇيلەرىنە بارىپ، ولارعا العىس ءبىلدىرىپ، قۇتتىقتاۋ سوزدەرىن جەتكىزدى. بۇل شارا قوعامداعى ءوزارا سىيلاستىق پەن ريزاشىلىق مادەنيەتىن نىعايتۋعا، جاستاردى ۇلتتىق قۇندىلىقتارعا تاربيەلەۋگە باعىتتالعان ماڭىزدى باستاما بولىپ سانالادى.
«العىس – بىرلىك باستاۋى» مەرەكەسى قوعامداعى ءوزارا سىيلاستىقتى ارتتىرۋعا، ەتنومادەني قۇندىلىقتاردى ناسيحاتتاۋعا جانە ۇلتارالىق كەلىسىمدى ساقتاۋعا ارنالعان ەستە قالارلىق شارا بولدى. بۇل كۇن ءاربىر قاتىسۋشى ءۇشىن كوكتەمنىڭ، قۋانىش پەن تاتۋلىقتىڭ سيمۆولىنا اينالدى.
