كتك تەلەارناسىنىڭ حابارلاۋىنشا، قالپىنا كەلتىرۋگە شامامەن 6 ميلليارد تەڭگە قاجەت، بىراق بۇل الدىن الا بەرىلگەن سوما عانا. قازىر جۇمىسشىلار تالدىقورعان قالاسىنىڭ باس اكىمشىلىك عيماراتىن قوقىستان تازارتىپ جاتىر، دەپ حابارلايدى "ادىرنا" ۇلتتىق پورتالى.
ءتارتىپ بۇزۋشىلار 5 قاڭتاردا وبلىس اكىمدىگىنىڭ عيماراتىنا شابۋىل جاساعان. اكىمشىلىكتى باسىپ الۋ كەزىندە جۇمىس ورنىندا قىزمەتكەرلەر بولماعان. ناتيجەسىندە عيمارات ورتكە وراندى.
سەمەيدە دە قالالىق اكىمدىككە شابۋىل جاسالدى. قىلمىسكەرلەر 170-تەن استام ەسىكتى بۇزىپ، ءبىرىنشى قاباتتاعى بارلىق تەرەزەنى، ال ۇستىڭگى قاباتتاعى 25 تەرەزەنى شاعىپ كەتكەن»، - دەلىنگەن حابارلامادا.
توناۋشىلار سەيفتەردى اشىپ، كەيبىر مۇلىكتى: كومپيۋتەرلەر، نوۋتبۋكتار، دىبىس جازۋ قۇرىلعىلارى مەن پرينتەرلەردى ۇرلاپ كەتكەن. الىپ كەتەتىنىن الىپ كەتتى، قالعانى سىنعان كۇيىندە قالعان. بارلىق بولمەنىڭ قابىرعالارى قيراعان.
قازىر عيمارات قالپىنا كەلتىرىلۋدە. سىنعان كىرەبەرىس ايماقتارى مەن تەرەزەلەرى قالپىنا كەلتىرىلدى. قازىرگى ۋاقىتتا ارلەۋ جۇمىستارى ءجۇرىپ جاتىر، بايلانىس، ءورت جانە كۇزەت دابىلدارى، بەينەباقىلاۋ جۇيەسى قالپىنا كەلتىرىلۋدە. جۇمىستار ناۋرىز ايىنىڭ سوڭىنا دەيىن اياقتالادى دەپ كۇتىلۋدە. ولارعا 200 ميلليون تەڭگە قاجەت.
«قايعىلى قاڭتار» وقيعاسى كەزىندە اقتوبەدە نارازى توپ وبلىس اكىمدىگىنىڭ عيماراتىن باسىپ الدى. جەرگىلىكتى بيلىك بۇلىنگەن مۇلىكتى كەلەسى اپتادان باستاپ قالپىنا كەلتىرۋدى جوسپارلاپ وتىر. ازىرگە تەك ەسىكتەرى عانا اۋىستىرىلدى.
تارازدا دا وبلىس اكىمدىگىنىڭ عيماراتىن قالپىنا كەلتىرۋ جۇمىستارى قارقىندى جۇرگىزىلۋدە. ىشكى بەزەندىرۋ جۇمىستارىنىڭ جارتىسى عانا اياقتالدى. كۇردەلى جوندەۋدىڭ جالپى سوماسى ميلليارد تەڭگەدەن اسادى. جەرگىلىكتى تۇرعىندار جاڭارتىلعان اكىمدىكتى 1 ناۋرىزدا ءبىر-اق كورەدى.
– قازىرگى تاڭدا 150 ادام، 18 تەحنيكا جۇمىس ىستەپ جاتىر. سىرتتا فاساد بولىگى، فارفوردان جاسالعان تاستان جاسالعان بۇيىمدار، جەرتولە بولىگىندە جوندەۋ جۇمىستارى جۇرگىزىلدى. اكىم اپپاراتى دا سولاي، - دەيدى «ينتەللەكت ازيا» جشس ۋچاسكەسىنىڭ مەڭگەرۋشىسى يسمايل كوپجاساروۆ.
ەڭ كوپ شىعىن الماتى اكىمدىگىنىڭ عيماراتىنا كەلتىرىلگەن. وزدەرىڭىز بىلەسىزدەر، بۇلىكشىلەر قالا اكىمدىگىن باسىپ الىپ، كەيىن ونى ورتەپ جىبەردى. قازىر اكىمدىكتىڭ تەك ورتەنگەن قابىرعالارى عانا قالدى.
قاڭتار ايىنىڭ سوڭىندا الماتى بيلىگى تسيفرلاردى جاريالادى: عيماراتتى قالپىنا كەلتىرۋ ءۇشىن 20 ميلليارد تەڭگە قاجەت. تەلەارنانىڭ حابارلاۋىنشا، شەنەۋنىكتەر ازىرگە قالا اكىمدىگى عيماراتىنداعى جوندەۋ جۇمىستارىنىڭ بارىسى تۋرالى ەشقانداي اقپاراتپەن بولىسپەگەن.
"ادىرنا" ۇلتتىق پورتالى
