تاۋەلسىزدىكتىڭ العاشقى جىلدارىنان باستاپ ەلىمىز جۇرگىزگەن كوشى-قون ساياساتى ءوز جەمىسىن بەرىپ ۇلگەردى. كوشپەن بىرگە “اسىل بەرگەك، التىن دىڭگەك” بولاتىن تالاي مىقتى، ەل قامىن جەيتىن ازاماتتار كەلدى.
بۇگىن دۇنيەجۇزى قازاقتارىنىڭ قاۋىمداستىعىنىڭ ۇيىمداستىرۋىمەن الماتى قالاسىندا قاۋىمداستىقتىڭ جاڭا فيليال باسشىسى رەتىندە اقىن، فيلوسوف، قازاقستان جازۋشىلار وداعىنىڭ مۇشەسى، حالىقارالىق تۇركىسوي ۇيىمى باس حاتشىسىنىڭ كەڭەسشىسى مۇراتحان شوقاندى تانىستىرۋ جيىنى ءوتتى.
جيىن بارىسىندا توراعانىڭ ءبىرىنشى ورىنباسارى زاۋىتبەك تۇرىسبەكوۆتىڭ تاعايىنداۋ حاتىن ونىڭ ورىنباسارى قارلىعاش بەكپاتشاقىزى مەن باس قارجىگەر لاتيفا مۋكاەۆنا جەتكىزدى.
سونداي-اق اقىن، «انا ءتىلى» گازەتىنىڭ باس رەداكتورى ەرلان ءجۇنىس، «اقيقات» جۋرنالىنىڭ باس رەداكتورى ءداۋىرجان تولەباەۆ، «زەينوللا سانىك اتىنداعى مادەنيەت قورىنىڭ» قۇرىلتايشىسى قانات زەينوللا، اقىن ەربول بەيىلحان، الماتى تەمىرجول كولىگى كوللەدجىنىڭ ديرەكتورى الماس قاليەۆ، جامالي ديحانۇلى جانە وزگە دە زيالى قاۋىم وكىلدەرى ءسوز سويلەپ، قولداۋ بىلدىرەتىندەرىن جەتكىزدى.
ەرلان ءجۇنىس قاۋىمداستىق تەك شەتەلدەن كەلگەن قانداستارعا عانا ەمەس، جەرگىلىكتى قازاقتاردى دا قامتيتىنىن، ءار باعىتتا تابىستى جۇمىس جۇرگىزۋ كەرەكتىگىن اتاپ ءوتتى.
قانات زەينوللا تىڭ جوبالارعا قارجىلاي قولداۋ كورسەتۋگە دايىن ەكەنىن ايتتى.
