چەحيا مەن سلوۆاكيا ارحيۆتەرىنەن ءاليحان بوكەيحانعا قاتىستى تىڭ دەرەكتەر تابىلعان، دەپ حابارلايدى "ادىرنا" ۇلتتىق پورتالى قازاقپاراتقا سىلتەپ.
الاش كوسەمىنىڭ تۋعانىنا 160 جىل تولۋىنا ارنالعان حالىقارالىق عىلىمي-تاجىريبەلىك كونفەرەنتسيادا شەتەل ارحيۆتەرىنەن الاشوردا ۇكىمەتى مەن چەحوسلوۆاك كورپۋسى اراسىنداعى بايلانىسقا قاتىستى قۇندى دەرەكتەر انىقتالعانى حابارلاندى.
قازاقستاندا يندرجيح دۆورجاكتىڭ 1921 جىلى پراگادا چەح تىلىندە شىققان «U kirgizů» كىتابىنىڭ قازاق جانە ورىس تىلدەرىندەگى نۇسقاسى تانىستىرىلدى. قازاقشا اۋدارماسىن جاس زەرتتەۋشى دىنمۇحاممەد بايجۇما جاساعان، ال ورىسشاعا سۇلتان كاماليدەن اۋدارعان.
كىتاپتا ءاليحان بوكەيحان تۋرالى ەستەلىكتەر جانە الاشوردا تۋرالى دەرەكتەر قامتىلعان.
دىنمۇحاممەد بايجۇمانىڭ ايتۋىنشا، دۆورجاك كىتابىندا ءاليحان مەن چەحوسلوۆاك لەگيونەرى اراسىنداعى كەزدەسۋلەر تۋرالى جازىلعان. 1918 جىلى ومبىدا وتكەن كەزدەسۋدە الاش كوسەمى لەگيونەرگە: «مەن قازاق حالقىنىڭ تاۋەلسىزدىگىن اڭسايمىن. سىزدەر، چەحتەر، تاۋەلسىزدىكتى قالاي الساڭىزدار، ءبىز دە ازاتتىققا سولاي ۇمتىلۋعا دايىنبىز» – دەدى.
