بەلگىلەنگەن تراسسالاردان تىس جەردە سىرعاناۋ رەسەيلىك تۋريست ومىرىنە قاۋىپ توندىرە جازدادى. ءتۇن ورتاسىنا قاراي Shymbulak كۋرورتىنىڭ قىزمەتكەرلەرىنە ءبىر قىز جۇگىندى. ونىڭ ايتۋىنشا، «پروفەسسور» تراسساسىندا سىرعاناپ جۇرگەن كەزدە سەرىگى وزەن جاققا كەنەت بۇرىلىپ كەتىپ، كوزدەن عايىپ بولعان.
كۋرورتتىڭ كەزەكشى قىزمەتكەرى ماحامبەت ابدۋللاەۆ بۇل اقپاراتتى بىردەن جەدەل باسقارۋ ورتالىعىنا جەتكىزدى. ىزدەستىرۋ جۇمىستارىنا جەدەل تۇردە كۋرورتتىڭ قاۋىپسىزدىك قىزمەتى مەن قۇتقارۋشىلارى جۇمىلدىرىلدى.
«قىز قاتتى ۋايىمداپ تۇردى. مەن ونىڭ جانىندا قالىپ، باسقارۋ ورتالىعىمەن بايلانىستا بولدىم. ال سول ۋاقىتتا كۋرورتتىڭ قۇتقارۋشىلارى مەن قاۋىپسىزدىك قىزمەتىنىڭ اۋىسىم باسشىسى وقيعا ورنىندا ىزدەستىرۋ جۇمىستارىن جۇرگىزىپ جاتتى»، — دەيدى ماحامبەت ابدۋللاەۆ.
ىزدەۋ جۇمىستارى تۇڭگى ۋاقىتتا جۇرگىزىلگەندىكتەن جانە جەر بەدەرىنىڭ كۇردەلىلىگى قۇتقارۋشىلاردىڭ جۇمىسىن ودان ءارى قيىنداتتى. بىرنەشە مينۋتتان كەيىن ەر ادام كۋرورت اۋماعىنان تىس جەردەن تابىلدى.
ونى قۇتقارۋعا قوسىمشا كۇش قاجەت بولدى. سوندىقتان وپەراتسياعا الماتى قالاسىنىڭ قۇتقارۋ قىزمەتىنىڭ ماماندارى دا تارتىلدى. سونداي-اق وقيعا ورنىنا تجد قىزمەتكەرلەرى، ءورت سوندىرۋشىلەر جانە اپاتتار مەديتسيناسى ورتالىعىنىڭ مامانى كەلدى.
قۇتقارۋ قىزمەتتەرىنىڭ بىرلەسكەن جۇمىسىنىڭ ارقاسىندا ەر ادام قاۋىپسىز جەرگە شىعارىلىپ، كۋرورتتىڭ بازالىق ستانتسياسىنا جەتكىزىلدى. دارىگەرلەر ءتۋريستى تەكسەرگەندە ەشقانداي جاراقات انىقتالعان جوق. ول ەمحاناعا بارۋدان باس تارتتى.
«قۇتقارۋشىلارعا العىس ايتقىم كەلەدى. ولار مەنى تاۋىپ، شىعۋعا كومەكتەستى جانە قولداۋ كورسەتتى. مەن وتە ريزامىن. Shymbulak — كەرەمەت كۋرورت، مۇندا تاعى دا كەلەمىن»، — دەدى تۋريست.
Shymbulak قۇتقارۋشىلارى ەسكە سالادى: دايىندالعان تراسسالاردان تىس جەردە سىرعاناۋ، اسىرەسە تۇنگى ۋاقىتتا، قاۋىپتى بولۋى مۇمكىن. كۋرورت قىزمەتكەرلەرى ارقاشان كومەك كورسەتۋگە دايىن، دەگەنمەن ەڭ قاۋىپسىز باعىت — بەلگىلەنگەن تراسسالار.
بيىلعى قىسقى ماۋسىم باستالعالى بەرى بۇل كۋرورتتاعى ءۇشىنشى قۇتقارۋ وپەراتسياسى. ولاردىڭ بارلىعى ءساتتى اياقتالدى.
