قازاقستاننىڭ ءبىرىنشى ەلەنا رىباكينا ينديان-ۋەللس (اقش) WTA 1000 ءتۋرنيرىنىڭ جارتىلاي فينالىنا شىعىپ، الەمنىڭ ەكىنشى راكەتكاسى اتاندى، دەپ حابارلايدى "ادىرنا".
قازاقستاندىق تەننيسشى شيرەك فينالدا الەمنىڭ 5-راكەتكاسى، امەريكالىق دجەسسيكا پەگۋلاعا قارسى كەلدى.
بۇل قوس سپورتشىنىڭ ءوزارا سەگىزىنشى كەزدەسۋى ەدى. وسىعان دەيىن 7 ماتچتىڭ تورتەۋىندە رىباكينا جەڭدى.
ءبىرىنشى پارتيادا ەلەنا ايقىن باسىمدىلىق تانىتتى – 6:1.
ەكىنشى سەتتە پەگۋلا 4:2 ەسەبىمەن العا كەتكەنىمەن، رىباكينا تارازى باسىن تەڭەستىرە الدى – 4:4. اقىرى تاي-برەيكتە مەرەيى ۇستەم بولدى – 7:6 (7:4).
ءبىر ساعات 28 مينۋتقا سوزىلعان باسەكەدە رىباكينا 7 ەيسپەن بىرگە 4 برەيك-پوينتتىڭ ۇشەۋىن ءوز ەسەبىنە جازدى. پەگۋلا 5 ەيس، ءبىر برەيكپەن (5 برەيك-پوينت) كوزگە ءتۇستى.
ەلەنا رىباكينا فينالعا شىعۋ ءۇشىن الەمنىڭ 9-راكەتكاسى، ۋكراينالىق ەلينا سۆيتولينامەن تالاسادى. ول شيرەك فينالدا الەمنىڭ 2-راكەتكاسى، پولشا وكىلى يگا شۆەنتەكتى قاپى قالدىردى – 6:2, 4:6, 6:4.
قازىرگى live-رەيتينگ بويىنشا رىباكينانىڭ ەنشىسىندە 7523 ۇپاي بار جانە ول ەكىنشى ورىندا تۇر. ال رەيتينگ كوشىن 10415 ۇپاي جيناعان بەلارۋستىك تەننيسشى ارينا سوبولەنكو باستاپ كەلەدى.
