بۇگىن، 16 ناۋرىز الماتىدا قازاقستاننىڭ تانىمال كلۋبتارى – «قايرات» پەن «اقتوبە» اراسىندا فۋتبول ماتچى وتەدى، دەپ حابارلايدى "ادىرنا".
ويىنعا بايلانىستى الماتى قالاسى پوليتسيا دەپارتامەنتى ستاديون اۋماعىندا جانە ونىڭ ماڭىندا قوعامدىق قاۋىپسىزدىكتى قامتاماسىز ەتۋ شارالارىن كۇشەيتتى.
الماتى قالالىق پوليتسيا دەپارتامەنتىنىڭ باستىعى، پوليتسيا گەنەرال-مايورى ايدىن قابدۋلدينوۆتىڭ ايتۋىنشا، سپورتتىق ءىس-شارا كەزىندەگى قوعامدىق ءتارتىپ تۇراقتى باقىلاۋدا بولادى.
«ماتچ وتەتىن كۇنى ستاديون مەن ونىڭ ماڭىنداعى اۋماقتا قاۋىپسىزدىك شارالارى بارىنشا كۇشەيتىلەدى. قوسىمشا پوليتسيا كۇشتەرى جۇمىلدىرىلادى. ويىن وتەتىن اۋماق تولىق باقىلاۋدا بولادى»، – دەدى ول.
سونداي-اق دەپارتامەنت باسشىسى جانكۇيەرلەردى ستاديوندا ءتارتىپ ساقتاۋعا شاقىردى.
«فۋتبول – ەموتسيا، كومانداعا دەگەن قولداۋ مەن جانكۇيەرلىك. الايدا بارلىعىنا ورتاق ءبىر قاعيدا بار: زاڭ مەن قوعامدىق ءتارتىپ كەز كەلگەن ەموتسيادان جوعارى»، – دەدى ايدىن قابدۋلدينوۆ.
پوليتسيا وكىلدەرى قوعامدىق ءتارتىپتى بۇزۋعا باعىتتالعان كەز كەلگەن ارەكەتكە جەدەل شارا قولدانىلاتىنىن ەسكەرتتى. اتاپ ايتقاندا، اگرەسسيا، ارانداتۋ، قورلاۋ، بەيادەپ سوزدەر ايتۋ، بۇزاقىلىق ارەكەتتەر جاساۋ جانە تىيىم سالىنعان زاتتاردى پايدالانۋ زاڭمەن قۋدالانادى.
«مۇنداي ارەكەتتەرگە پوليتسيا تاراپىنان بىردەن جاۋاپ بەرىلەدى. قۇقىق بۇزۋشىلار انىقتالىپ، ءاربىر دەرەككە قۇقىقتىق باعا بەرىلەدى»، – دەپ مالىمدەدى الماتىلىق پوليتسيا باسشىسى.
