ناۋرىزنامانىڭ ءبىر تارماعىنا اينالعان «شاڭىراق كۇنى» – وتباسى قۇندىلىعىن ۇلىقتاۋعا، ۇرپاقتار ساباقتاستىعىن دارىپتەۋگە ارنالعان ەرەكشە ءسات. وسى قۇندىلىقتاردى ناسيحاتتاۋ ماقساتىندا استانا قالاسىنىڭ جاستار ساياساتى ماسەلەلەرى باسقارماسى 17 ناۋرىز كۇنى «كوڭىلدى ستارت» وتباسىلىق ەستافەتاسىن ۇيىمداستىردى.
بەرەكەلى شاڭىراق يەلەرى باس قوسقان بايقاۋعا 40-قا جۋىق ەلورالىق جاس وتباسى قاتىستى. ولار ەكى كەزەڭنەن تۇراتىن سايىستا باق سىناپ، فينالدا 15 ۇزدىك توپ باسەكەگە ءتۇستى. سپورت دوداسىنىڭ العاشقى كەزەڭىندە كلاسسيكالىق ۇلگىدەگى ەستافەتالىق سىناقتار ازىرلەنسە، ەكىنشى كەزەڭدە ۇلتتىق ويىندار ويىناتىلدى.
سايىس ەرەجەسىنە سايكەس، جارىسقا 35 جاسقا دەيىنگى جۇپتار عانا قابىلداندى جانە كوماندا قۇرامى ەكى ادامنان (ەرلى-زايىپتى) جاساقتالدى.
جارىس قورىتىندىسى بويىنشا، ءى ورىندى – گابي احنازاروۆ پەن توپباسى ۇلجالعاس، ءىى ورىندى – ۆيكتور گريگورەۆ پەن اناستاسيا گريگورەۆا، ءىىى ورىن – سىرىم مۋحانبەتجانوۆ پەن انارا مۋحانبەتجانوۆا يەلەندى. ال 12 قاتىسۋشى العىس حاتقا يەگەرى اتاندى.
ەستافەتا جەڭىمپازدارى اقشالاي سىيلىقتارمەن ماراپاتتالدى: I ورىنعا – 200 000 تەڭگە، ءىى ورىنعا – 150 000 تەڭگە، ءىىى ورىنعا – 100 000 تەڭگە جانە شاپشاڭدىق تانىتقان وتباسىعا 20 000 تەڭگەدەن سىياقى بەرىلدى.
سونداي-اق ەستافەتا قاتىسۋشىلارىن قولداۋعا كەلگەن جانكۇيەرلەرگە ارنايى نوميناتسيالار تابىستالدى.
ايتا كەتەيىك، شارانىڭ قادىرلى قوناعى رەتىندە استانا قالاسىنىڭ جاستار ساياساتى ماسەلەلەرى باسقارماسىنىڭ باسشىسى يبراەۆ سامات، استانا قالاسى ءماسليحاتىنىڭ دەپۋتاتى نۇرجان سادىرباەۆ، «اكەلەر وداعى» رقب استانا قالاسى فيليالىنىڭ توراعاسى بەكدايىر كۇزەمباي، «قازاقستان ەستەتيكالىق توپتىق گيمناستيكا فەدەراتسياسى» قوعامدىق بىرلەستىگىنىڭ پرەزيدەنتى مادينا بەكتۇرعانوۆا قاتىستى.
سونىمەن قاتار جيىندا «Di Medical» مەديتسينالىق ورتالىعى» جشس ديرەكتورى كلارا ومىرزاقوۆا، ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى ءبىلىم جوعارى مەكتەبىنىڭ ديرەكتورى سومجۇرەك باۋبەك، جۋرناليست اسەلىم ءابىلدينوۆا مەن «ەۋرازيالىق بانك» اق فيليالىنىڭ اتقارۋشى ديرەكتورى اسيا كۋلدىباەۆا توبە كورسەتتى.
– بۇگىنگى ەستافەتا – تەك سپورتتىق جارىس ەمەس، دوستىق پەن بىرلىكتىڭ الاڭى. اسىرەسە جاس وتباسىلاردىڭ ىنتىماعىن نىعايتاتىن ماڭىزدى شارا دەپ سانايمىن. وزدەرىڭىزگە ءمالىم، استانا قالاسى اكىمدىگى قالا جاستارىن قولداۋعا جۇيەلى كوڭىل ءبولىپ كەلەدى. مادەني شارالار، سپورتتىق سايىستار، الەۋمەتتىك جوبالار ۇنەمى نازاردا.
بۇگىنگى سايىس سول ماڭىزدى باعىتتاردىڭ جالعاسى ەكەنى انىق. ونىڭ ۇستىنە ەستافەتانىڭ ناۋرىزناما ونكۇندىگىنىڭ «شاڭىراق كۇنىنە» تۇسپا-تۇس كەلۋى ەلەۋلى ءسات ەكەنىن ايتا كەتۋ كەرەكپىز. ءبارىڭىزدى كەلە جاتقان ۇلىستىڭ ۇلى كۇنى – ناۋرىز مەرەكەسىمەن قۇتتىقتايمىن، – دەدى سامات سابىرۇلى.
