قازاقستان حالقىنىڭ سانى 20,6 ميلليوننان استى. ۇلتتىق ستاتيستيكا بيۋروسىنىڭ دەرەگىنشە، 2026 جىلعى 1 قىركۇيەكتەگى جاعداي بويىنشا ەلدە 20 618 796 ادام تۇرادى، دەپ حابارلايدى "ادىرنا".
استانا حالقى العاش رەت 1,7 ميلليون ادامنان استى. قىركۇيەكتىڭ باسىندا ەلوردا تۇرعىندارىنىڭ سانى 1 700 385 ادامعا جەتكەن. بۇل ءبىر ايدا قالا حالقىنىڭ شامامەن 10 مىڭ ادامعا وسكەنىن كورسەتەدى. جىل باسىنان بەرى ەلوردا تۇرعىندارىنىڭ سانى 61 209 ادامعا ارتقان.
حالىق سانى ەڭ كوپ وڭىرلەر قاتارىندا الماتى قالاسى مەن تۇركىستان وبلىسى بار. الماتىدا 2 387 896, تۇركىستان وبلىسىندا 2 142 709 ادام تۇرادى. بۇدان بولەك، الماتى وبلىسىندا – 1 615 631, شىمكەنتتە – 1 316 888, جامبىل وبلىسىندا – 1 210 084, قاراعاندى وبلىسىندا 1 130 123 ادام تىركەلگەن.
حالىق سانى ەڭ از وڭىرلەر – ۇلىتاۋ وبلىسى (217 274 ادام), سولتۇستىك قازاقستان وبلىسى (510 756 ادام) جانە اباي وبلىسى (590 702 ادام).
ستاتيستيكاعا سايكەس، قازاقستان تۇرعىندارىنىڭ باسىم بولىگى قالالاردا تۇرادى. 1 قىركۇيەكتەگى ەسەپ بويىنشا قالا حالقىنىڭ سانى 13 236 041 ادامعا جەتكەن. جىل باسىنان بەرى بۇل كورسەتكىش 150 931 ادامعا وسكەن.
ال اۋىل تۇرعىندارىنىڭ سانى 7 382 755 ادامدى قۇرادى. جىل باسىنان بەرى اۋىل حالقى 31 957 ادامعا ازايعان.
جالپى، جىل باسىنان بەرى قازاقستان حالقى 118 974 ادامعا كوبەيگەن.
