فوتو: Elements.envato.com
ەۋرووداق كەڭەسى رەسەيگە قارسى اۋقىمدى 20-سانكتسيالىق پاكەتتى بەكىتتى. جاڭا تىزىمگە قازاقستانمەن بايلانىستى بىرقاتار كومپانيالار مەن جەكە تۇلعالار دا ەندى، دەپ حابارلايدى "ادىرنا" ۇلتتىق پورتالى vlast.kz سايتىنا سىلتەپ.
سانكتسيالىق تىزىمگە جالپى سانى 120 ادام مەن ۇيىم قوسىلعان. ولاردىڭ قاتارىندا قازاقستان، قىتاي، ءباا، وزبەكستان جانە بەلارۋستەن 16 كومپانيا بار.
اتاپ ايتقاندا، تىزىمگە نەمىستىڭ UrSeCo Handels GmbH & Co. KG كومپانياسىنىڭ اكتسيونەرى الەكساندر جدانوۆ ەنگىزىلدى. بۇل كومپانيا Wacker Chemie AG وندىرەتىن جوعارى تازارتىلعان حلورلى سۋتەگىن جەتكىزۋمەن اينالىسادى. اتالعان ءونىم جارتىلاي وتكىزگىش پلاستينالاردى وڭدەۋ ءۇشىن اسا ماڭىزدى حيميالىق زات سانالادى. سونىمەن قاتار تىزىمگە قازاقستانداعى «بىرىككەن ساۋدا توبى» جشس جانە ونىڭ قۇرىلتايشىسى ءالىمجان بەكوۆ ەنگىزىلگەن. قۇجاتتا «بىرىككەن ساۋدا توبى» جوعارى تازارتىلعان حلورلى سۋتەگىن رەسەيدىڭ «سيلترون» جشق-نا جەتكىزگەنى كورسەتىلگەن. بۇل كومپانيانىڭ باسىم ۇلەسى جدانوۆتىڭ اكەسىنە تيەسىلى. جەتكىزۋ تىزبەگى پولشا، تۇركيا جانە قازاقستان ارقىلى وتكەنى ايتىلعان.
جاڭا سانكتسيالار رەسەي كاسىپورىندارىنا جوعارى تازارتىلعان حلورلى سۋتەگىن ەكسپورتتاۋعا تىيىم سالادى.
سانكتسيالىق تىزىمگە رەسەيلىك كاسىپكەرلەر دميتري ماليۋتا مەن دەنيس شيشكين دە ەندى. ولار «بينا ينۆەست» جشق ارقىلى قازاقستان مەن وزبەكستاننان ماقتا تسەلليۋلوزاسىن يمپورتتايتىن كومپانيالاردى باقىلايدى. بۇل ماتەريالدار رەسەيدىڭ وق-ءدارى زاۋىتتارىندا جانە اسكەري ءونىم وندىرىسىندە قولدانىلادى.
جالپى العاندا، جاڭا پاكەت رەسەيدىڭ مۇناي ەكسپورتىنان تۇسەتىن تابىستى ازايتۋعا باعىتتالعان. قۇجاتتا كولەڭكەلى مۇناي سەكتورىندا جۇمىس ىستەيتىن كومپانيالارعا، سونىڭ ىشىندە ءۇشىنشى ەلدەردەگى ۇيىمدارعا جانە ءىرى تەڭىز ساقتاندىرۋشىسىنا شەكتەۋ قويىلاتىنى كورسەتىلگەن. ودان بولەك، رەسەيدىڭ «كولەڭكەلى فلوتىنىڭ» قۇرامىنا كىرەتىن 46 كەمە سانكتسياعا ىلىكتى.
ەۋرووداق 20 رەسەيلىك بانكپەن وپەراتسيا جۇرگىزۋگە تىيىم سالدى. سونىمەن قاتار سانكتسيالاردى اينالىپ ءوتتى نەمەسە رەسەيدىڭ قارجىلىق حابار الماسۋ جۇيەسىمەن (سپفس) بايلانىستى دەگەن كۇدىككە ىلىنگەن ءۇشىنشى ەلدەردەگى ءتورت قارجى ۇيىمىنا شەكتەۋ قويىلدى. بۇل قاتاردا قىرعىزستانداعى «كەرەمەت بانك» پەن «كاپيتال بانك» بار. ەۋروپالىق كومپانيالار مەن بانكتەر ولارعا گۋمانيتارلىق تولەمدەردەن باسقا وپەراتسيا جۇرگىزە المايدى.
بۇدان بولەك، قىرعىزستانداعى «تەنگريكوين» جاق تا سانكتسيالىق تىزىمگە ەنگىزىلدى. ول A7A5 ستەيبلكوينىن ساۋدالايتىن «مەەر» پلاتفورماسىن باسقارادى. ەۋرووداق مالىمەتىنشە، بۇل ۇيىم رەسەي ۇكىمەتىنە قولداۋ كورسەتىپ، پايدا كورەدى.
سانكتسيالار قىرعىزستانعا ساندىق باعدارلامامەن باسقارىلاتىن ستانوكتار مەن راديو جابدىقتارىن ەكسپورتتاۋعا دا تىيىم سالادى. ەۋرووداق بۇل شەشىمدى قىرعىزستان ارقىلى رەسەيگە قايتا ەكسپورت كولەمىنىڭ وسۋىمەن ءتۇسىندىردى.
جاڭا پاكەت اسكەري ءونىم وندىرەتىن 58 كومپانيا مەن ولارعا قاتىسى بار تۇلعالاردى قامتيدى. سونداي-اق رەسەيدىڭ قورعانىس سەكتورىنا تەحنولوگيالىق تۇرعىدا قولداۋ كورسەتەتىن 60 كاسىپورىنعا قاتىستى ەكسپورتتىق شەكتەۋلەر كۇشەيتىلەدى.
ەسكە سالساق، بۇعان دەيىن ەۋرووداقتىڭ 16-سانكتسيالىق پاكەتىنە قازاقستاندىق «Kazstanex» جانە «مەتاللستان» جشس-لارى ەنگەن بولاتىن. ەۋرووداق بۇل ۇيىمدار رەسەيدىڭ اسكەري-تەحنيكالىق الەۋەتىن ارتتىرۋعا ۇلەس قوسادى دەپ مالىمدەگەن.
