«NURORDA» مەكتەپ-ليتسەيىنىڭ وقۋشىسى نۇرگۇل ەگەنبەرگەنوۆا الەمدىك ءبىلىم بەرۋ رەيتينگىندە كوش باستاپ تۇرعان ەڭ بەدەلدى وقۋ ورنى - ماسساچۋسەتس تەحنولوگيالىق ينستيتۋتىنا (MIT, اقش) وقۋعا قابىلداندى. بۇل - قازاقستاندىق جاس زياتكەردىڭ حالىقارالىق ارەناداعى باسەكەگە قابىلەتتىلىگىن دالەلدەيتىن ايتۋلى وقيعا.
MIT ۋنيۆەرسيتەتىنە ءتۇسۋ - الەمدىك دەڭگەيدەگى ەڭ قيىن سىناقتاردىڭ ءبىرى بولىپ سانالادى. ماسەلەن، بيىلعى وقۋ جىلىندا 29 مىڭنان استام ۇمىتكەردىڭ ىشىنەن تەك 4-5%-ى عانا شاقىرتۋ العان. ال شەتەلدىك ستۋدەنتتەر ءۇشىن ىرىكتەۋ بۇدان دا قاتاڭ بولىپ، قابىلدانۋ دەڭگەيى نەبارى 2%-دى قۇرادى.
نۇرگۇلدىڭ ەرەكشە اكادەميالىق جەتىستىكتەرى مەن ينتەللەكتۋالدىق الەۋەتىن تەك MIT عانا ەمەس، سونىمەن قاتار الەمنىڭ توپ-100 تىزىمىنە كىرەتىن تاعى 5 جەتەكشى ۋنيۆەرسيتەتى مويىنداپ، شاقىرتۋ جىبەرگەن. ولاردىڭ قاتارىندا:
University of British Columbia (UBC, كانادا) - №38;
Hong Kong University of Science and Technology (HKUST, گونكونگ) - №44;
École Polytechnique (فرانتسيا) - №46;
Korea Advanced Institute of Science and Technology (KAIST, وڭتۇستىك كورەيا) - №53;
University of Warwick (ۇلىبريتانيا) - №74.
ايتا كەتەيىك، نۇرگۇل ەگەنبەرگەنوۆا بۇعان دەيىن دە ءبىلىم مەن عىلىم سالاسىنداعى ەرەن ەڭبەگى ءۇشىن مەملەكەت دەڭگەيىندە جوعارى باعالانعان بولاتىن. ول قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ جەكە قابىلداۋىندا بولىپ، مەملەكەت باسشىسىنىڭ قولىنان ارنايى سىياقى سەرتيفيكاتىن يەلەنگەن.
بۇگىندە وتاندىق ءبىلىم بەرۋ جۇيەسىنىڭ تۇلەكتەرى الەمدىك الپاۋىت وقۋ ورىندارىنىڭ نازارىنا ىلىگىپ، حالىقارالىق دەڭگەيدەگى عىلىمي ورتاعا نىق قادام باسۋدا. «NURORDA» مەكتەپ-ليتسەيىنىڭ وقۋشىسى العان بۇل شاقىرتۋلار توپتاماسى - سونىڭ ايقىن دالەلى.
