مەملەكەت باسشىسى قاسىم-جومارت توقاەۆ ەلىمىزدە الەمنىڭ جەتەكشى جوعارى وقۋ ورىندارىنىڭ فيليالدارىن اشۋ باستاماسى ءۇش جىل بۇرىن كوتەرىلگەنىن ەسكە سالدى، دەپ حابارلايدى "ادىرنا" ۇلتتىق پورتالى.
بۇل تۋرالى اقوردانىڭ ءباسپاسوز قىزمەتى حابارلادى.
پرەزيدەنت الماتى قالاسىنا جۇمىس ساپارى اياسىندا ءال-فارابي اتىنداعى قازاق ۇلتتىق ۋنيۆەرسيتەتىنىڭ عىلىمي الەۋەتىمەن تانىستى. مەملەكەت باسشىسىنىڭ ايتۋىنشا، شەتەلدىك ۋنيۆەرسيتەتتەردىڭ ءاربىر فيليالى قازاقستانداعى جوعارى ءبىلىم بەرۋ ساپاسىن ارتتىرىپ، باسەكەلەستىكتى كۇشەيتۋى ءتيىس.
"بۇل باستاما، ەڭ الدىمەن، جاستارعا ءوز ەلىندە ساپالى ءبىلىم الۋعا مۇمكىندىك بەرەدى. سونىمەن قاتار، حالىقارالىق ءبىلىم بەرۋ باعدارلامالارى مەن وزىق ستاندارتتاردى ەنگىزۋگە جول اشادى، — دەدى مەملەكەت باسشىسى.
قازىرگى تاڭدا قازاقستاندا 30-دان استام شەتەلدىك جوعارى وقۋ ورنىنىڭ فيليالى جۇمىس ىستەيدى. ولاردىڭ قاتارىندا ماسكەۋ ينجەنەرلىك فيزيكا ينستيتۋتى، اريزونا ۋنيۆەرسيتەتى، سوربوننا ۋنيۆەرسيتەتى، كارديفف ۋنيۆەرسيتەتى، دە مونتفورت ۋنيۆەرسيتەتى جانە بەيجىڭ ءتىل جانە مادەنيەت ۋنيۆەرسيتەتى بار.
الايدا پرەزيدەنت بۇل جۇمىستىڭ تەك سان قۋمەن شەكتەلمەۋى كەرەكتىگىن اتاپ ءوتتى.
"بىزگە ەسەپ ءۇشىن اشىلعان، ۇلتتىق عىلىمدى دامىتۋعا قاۋقارسىز فيليالداردىڭ قاجەتى جوق. نەگىزگى نازار ساپادا بولۋى ءتيىس", — دەدى ول.
مەملەكەت باسشىسى ەلدىڭ بولاشاعى ءبىلىم مەن عىلىمنىڭ دامۋىنا تىكەلەي بايلانىستى ەكەنىن اتاپ ءوتتى.
ء"بىز ادام كاپيتالىنىڭ ساپاسىن ارتتىرۋ ءۇشىن قولدان كەلگەننىڭ ءبارىن جاساۋىمىز قاجەت. ەلىمىزدىڭ عىلىمي جانە اكادەميالىق قاۋىمداستىعىنىڭ بارلىق وكىلىنە قاراتا ايتقىم كەلەدى. قازاقستاننىڭ ەرتەڭى قانداي بولادى، قانشالىقتى جاڭاشىل ءارى وزىق ەلگە اينالا الامىز؟ بۇل سىزدەردىڭ يدەيالارىڭىزعا، زەرتتەۋلەرىڭىزگە، جۇمىستارىڭىزدىڭ ناتيجەسىنە، اشقان جاڭالىقتارىڭىزعا تىكەلەي بايلانىستى. بارشامىز كۇش جۇمىلدىرا وتىرىپ، قازاقستاندى ەۋرازياداعى جەتەكشى عىلىمي جانە تەحنولوگيالىق ورتالىققا اينالدىرا الاتىنىمىزعا سەنەمىن.", — دەدى پرەزيدەنت.
ول سونداي-اق كەلەشەك ۇرپاق بۇگىنگى مۇمكىندىكتەردى ءتيىمدى پايدالانباعان جاعدايدا ونى كەشىرمەيتىنىن ايتىپ، قازاقستاندى ادىلەتتى ءارى قۋاتتى مەملەكەتكە اينالدىرۋ – ورتاق مىندەت ەكەنىن جەتكىزدى.
"كەلەر ۇرپاق ءبىزدىڭ كەيبىر كەمشىلىكتەرىمىزگە كوز جۇما قارايتىن شىعار. بىراق ولار قازاقستاندى ادىلەتتى، قۋاتتى مەملەكەتكە اينالدىراتىن، زاڭ مەن ءتارتىپ، تازالىق، تابيعاتتى ايالاۋ، ءبىلىم جانە عىلىم سالتانات قۇراتىن مۇمكىندىكتى ءمۇلت جىبەرگەنىمىزدى ەشقاشان كەشىرمەيدى. قازاقستان وسىنداي ەل بولۋى كەرەك. ءبىزدىڭ تۇپكى ماقساتىمىز – وسى", - دەدى مەملەكەت باسشىسى.
