استانادا سالىنىپ جاتقان LRT جۇيەسىنە قاتىستى ۆيدەو قوعام نازارىن اۋداردى. قالا تۇرعىندارىنىڭ ءبىرى ارنايى كيىمدەگى جۇمىسشىلاردىڭ ەكى ۆاگوندى ارقانمەن سۇيرەپ بارا جاتقان ءساتىن ۆيدەوعا ءتۇسىرىپ العان. جازبا الەۋمەتتىك جەلىلەردە تەز تاراپ، ءتۇرلى پىكىر مەن ازىلگە سەبەپ بولدى، دەپ حابارلايدى “ادىرنا”.
كادرلاردا ۆاگونداردىڭ ەلەكتر قۋاتىنسىز، تولىقتاي قول كۇشىمەن قوزعالىپ جاتقانى كورىنەدى. بۇل كورىنىس كوپشىلىككە زاماناۋي كولىك جۇيەسىنە ءتان ەمەس جاعداي رەتىندە قابىلدانىپ، الەۋمەتتىك جەلى قولدانۋشىلارى اراسىندا قىزۋ تالقىلاندى. ءبىرى مۇنى تاريحي كەزەڭدەرمەن سالىستىرسا، ەندى ءبىرى ونى قۇرىلىس بارىسىنداعى سىناق نەمەسە تەحنيكالىق دايىندىقتىڭ ءبىر بولىگى بولۋى مۇمكىن دەپ بولجادى.
قازىرگى ۋاقىتتا بۇل جاعدايعا قاتىستى رەسمي تۇسىنىكتەمە بەرىلگەن جوق. دەگەنمەن، LRT جوباسىن ىسكە اسىرۋ جۇمىستارى جوسپارعا سايكەس جالعاسىپ جاتقانى ايتىلۋدا. جوبانى جۇزەگە اسىرۋ بارىسىندا ينفراقۇرىلىمنىڭ ءتۇرلى كەزەڭدەرى تەكسەرىلىپ، سىناقتار جۇرگىزىلەتىنى بەلگىلى.
قالا بيلىگىنىڭ مالىمەتىنشە، LRT جەلىسىن الداعى كوكتەمدە ىسكە قوسۋ جوسپارلانعان. جول اقىسى شامامەن 100–200 تەڭگە ارالىعىندا بولادى.
الەۋمەتتىك جەلىدە تاراعان بەينە كوپشىلىكتىڭ نازارىن اۋدارعانىمەن، ماماندار مۇنداي جاعدايلاردىڭ قۇرىلىس نەمەسە سىناق كەزەڭدەرىندە كەزدەسەتىنىن جوققا شىعارمايدى. جوبا تولىق ىسكە قوسىلعاندا، LRT زاماناۋي ەلەكترلىك كولىك جۇيەسى رەتىندە جۇمىس ىستەيدى دەپ كۇتىلۋدە.
