ءاز-ناۋرىز مەرەكەسى: تارازدا تاڭدا باستالعان دۋمان كەشكە دەيىن جالعاستى

تاراز قالاسىندا ۇلىستىڭ ۇلى كۇنى — ناۋرىز مەيرامى بيىل ايرىقشا كەڭ كولەمدە اتالىپ ءوتتى.

ءاز ناۋرىز اۋەلى تال ەگۋدەن باستالدى. كونە شاھاردى كوركەيتۋگە باعىتتالعان يگى شارادا 500-گە جۋىق تال وتىرعىزىلىپ، قالا كەلبەتىن ودان ءارى ايشىقتاي ءتۇستى.

جايماشۋاق كوكتەمنىڭ جارقىن مەرەكەسىنە وراي ورتالىق الاڭ ۇلتتىق ناقىشتاعى ويۋ-ورنەكتەرمەن بەزەندىرىلىپ، شاھار تۇرعىندارى مەن قوناقتارىنا ەرەكشە مەرەكەلىك كوڭىل كۇي سىيلادى.

ورتالىق الاڭنان باستاپ جەلتوقسان كوشەسىنە دەيىن اق شاڭقان كيىز ۇيلەر بوي كوتەرىپ، ارقايسىسىنا تاعىلىمدى اتاۋلار بەرىلدى.

كيىز ۇيلەردىڭ ىشكى كورىنىسى ۇلتتىق قۇندىلىقتاردى دارىپتەيتىن بۇيىمدارمەن قاتار، تسيفرلاندىرۋ جانە جاساندى ينتەللەكت جوبالارىمەن ۇيلەسىم تاۋىپ، ءداستۇر مەن زاماناۋي تەحنولوگيانىڭ ساباقتاستىعىن ايقىن كورسەتتى.

مەرەكە اياسىندا ارقان تارتىس، لاڭگى تەبۋ، اسىق اتۋ، قول كۇرەسى، قازاقشا كۇرەس سەكىلدى ۇلتتىق ويىنداردان تارتىستى باسەكەلەر ۇيىمداستىرىلىپ، قاتىسۋشىلار ءوزارا مىقتىنى انىقتادى.

سونداي-اق قولونەرشىلەردىڭ كوزدىڭ جاۋىن الاتىن تۋىندىلارى كوپشىلىك نازارىنا ۇسىنىلدى.

جامبىل وبلىسىنىڭ اكىمى ەربول قاراشوكەەۆ، شاھار باسشىسى باقىتجان ورىنبەكوۆ، قر پارلامەنتى ءماجىلىسىنىڭ دەپۋتاتتارى، ارداگەرلەر مەن زيالى قاۋىم وكىلدەرى حالىقپەن بىرگە كيىز ۇيلەر مەن كورمەلەردى ارالاپ، مەرەكەلىك دۋماندى تاماشالادى.

ءىس-شارا بارىسىندا «جاڭا كۇن» اتتى تەاترلاندىرىلعان قويىلىم ساحنالانىپ، ناۋرىزدىڭ ءمان-ماعىناسى كوركەم تۇردە بەينەلەندى.

سونىمەن قاتار قانات پەن سۆەتا ايتباەۆتار، ايگۇل قوسانوۆا، دوسىمجان تاڭاتاروۆ، نۇرلان ءالىمجان، ايگەرىم قالاۋباەۆا جانە قىرعىز رەسپۋبليكاسىنان كەلگەن كانىكەي رايماليەۆا سىندى تانىمال ەسترادا جۇلدىزدارى ءان شىرقاپ، مەرەكەنىڭ اجارىن اشا ءتۇستى.

كوڭىلدى دۋمان كەشكى ساعات 19:00-دە وتكەن گالا كونتسەرتكە ۇلاستى.

كەش بارىسىندا نۇرلان ءالىمجان، ايگەرىم قالاۋباەۆا، بايانسۇلۋ جانە تۇركيا ەلىنە تانىمال مۋرات ياپراك سىندى ونەر جۇلدىزدارى ءان شىرقاپ، جۇرتشىلىقتى قۋانىشقا كەنەلتتى

وسىلايشا، تاراز تورىندە وتكەن ءاز ناۋرىز مەيرامى ۇلتتىق رۋحتى ۇلىقتاپ، كوپشىلىككە ۇمىتىلماس اسەر قالدىردى.