شاحتينسك قالاسىنداعى كوپقاباتتى تۇرعىن ۇيلەردىڭ بىرىندە تۇرمىستىق گاز باللونىنان شىققان گاز-اۋا قوسپاسى جارىلدى، دەپ حابارلايدى “ادىرنا” ۇلتتىق پورتالى.
وقيعا سالدارىنان سەگىز ادام زارداپ شەكتى. ولاردىڭ بەسەۋى شاقىرتۋعا كەلگەن پوليتسيا قىزمەتكەرلەرى ەكەنى انىقتالعان.
تجد مالىمەتىنشە، وقيعا تۋرالى حابار قاراعاندى وبلىسى تجد-ءنىڭ 112 پۋلتىنە پوليتسيادان تۇسكەن.
قۇتقارۋشىلار وقيعا ورنىنا ءتورت مينۋت ىشىندە جەتكەن. بارعان كەزدە پاتەر ىشىندە جيھاز بەن تۇرمىستىق زاتتاردىڭ جانۋى تىركەلگەن.
قۇتقارۋشىلار باسپالداق ارقىلى جوعارعى قاباتتاردان بەس ادامدى ەۆاكۋاتسيالادى. ءورت سوندىرۋشىلەر كەلگەنگە دەيىن پوليتسيا قىزمەتكەرلەرى دە تۇرعىنداردى سىرتقا شىعارعان. قالعان تۇرعىندار وزدىگىنەن ەۆاكۋاتسيالانعان.
زارداپ شەككەندەر مەديتسينالىق مەكەمەگە جەتكىزىلدى.
ءورت 40 شارشى مەتر اۋماقتا تولىق ءسوندىرىلدى. قازىرگى تاڭدا وقيعانىڭ سەبەپتەرى مەن ءمان-جايى انىقتالىپ جاتىر. وقيعا ورنىندا ءورت ءسوندىرۋ شتابى قۇرىلىپ، بارلىق ءتيىستى قىزمەتتەر جۇمىس ىستەۋدە.
قاراعاندى وبلىسى پوليتسيا دەپارتامەنتى مالىمەتىنشە، بوتەننىڭ مۇلكىن قاساقانا جويۋ فاكتىسى بويىنشا قىلمىستىق ءىس قوزعالىپ، 40 جاستاعى كۇدىكتى ۇستالعان. ول قازىر شاحتينسك قالالىق اۋرۋحاناسىنىڭ ارنايى پالاتاسىندا كۇزەتپەن جاتىر. ساۋىعىپ شىققاننان كەيىن ۋاقىتشا ۇستاۋ يزولياتورىنا قامالماق.
