فوتو: kun.uz
تاشكەنت قالاسىندا انگليا مەن ۋەلستىڭ جالپى قۇقىعى نەگىزىندە جۇمىس ىستەيتىن حالىقارالىق قارجى ورتالىعى قۇرىلماق. جوبا تانىستىرىلىمىمەن شاۆكات ميرزيوەۆ تانىستى، دەپ حابارلايدى “ادىرنا” پورتالى Kun.uz سايتىنا سىلتەپ.
ۇسىنىلعان ەسەپتەۋلەرگە سايكەس، 2030 جىلعا قاراي ورتالىق قوسىمشا 20-25 ملرد اقش دوللارى كولەمىندە ينۆەستيتسيا تارتۋعا، جىل سايىنعى ءجىو وسىمىنە 1%-عا دەيىن ۇلەس قوسۋعا، 15 مىڭعا دەيىن جوعارى بىلىكتى جۇمىس ورنىن قۇرۋعا جانە شامامەن 10 مىڭ ماماننىڭ بىلىكتىلىگىن ارتتىرۋعا مۇمكىندىك بەرەدى.
ورتالىقتىڭ جۇمىس ىستەۋى ءۇشىن ارنايى قۇقىقتىق رەجيم ەنگىزۋ جوسپارلانىپ وتىر. ونىڭ اياسىندا انگليا مەن ۋەلستىڭ جالپى قۇقىعى ورتالىق تۋرالى زاڭناماعا قايشى كەلمەيتىن بولىگىندە قولدانىلاتىن بولادى. باسقارۋشى ورگاندارعا ءوز نورماتيۆتىك-قۇقىقتىق اكتىلەرىن قابىلداۋ قۇقىعى بەرىلەدى.
ورتالىق قۇرىلىمىندا حالىقارالىق كوممەرتسيالىق سوت پەن اربيتراج ورتالىعىن قۇرۋ قاراستىرىلعان. ولار رەزيدەنتتەردىڭ قاتىسۋىمەن تۋىندايتىن داۋلاردى قارايتىن بولادى.
ورتالىق رەزيدەنتتەرىنە بىرقاتار جەڭىلدىكتەر ۇسىنىلادى. اتاپ ايتقاندا، كاپيتالدىڭ ەركىن قوزعالىسى مەن رەپاترياتسياسى، ەركىن ۆاليۋتالىق وپەراتسيالار، تسيفرلىق اكتيۆتەرمەن جۇمىس ىستەۋ مۇمكىندىگى، سالىقتىق جەڭىلدىكتەر جانە جەڭىلدەتىلگەن ۆيزالىق ءتارتىپ قاراستىرىلعان.
ورتالىق قىزمەتىنىڭ نەگىزگى باعىتتارى رەتىندە قارجى-ينۆەستيتسيالىق جانە بانكتىك قىزمەتتەر، ساقتاندىرۋ، باعالى قاعازدار نارىعى، تولەم جۇيەلەرى، سونداي-اق قارجىلىق تەحنولوگيالار مەن تسيفرلىق اكتيۆتەرمەن وپەراتسيالاردى دامىتۋ بەلگىلەنگەن.
