Bayansulu لاقاپ اتىمەن تانىمال ءانشى بايانسۇلۋ ساعىندىقوۆانىڭ رەپەرتۋارىنداعى نەگىزگى حيت اندەردىڭ اۆتورى، كومپوزيتور قۋات ءابىل رەسمي مالىمدەمە جاسادى، دەپ حابارلايدى "ادىرنا".
كومپوزيتوردىڭ ايتۋىنشا، ول ءانشىنىڭ ەڭ تانىمال «ۇمىتسام دا»، «سوندايىم بار ەندى»، «اۋا رايى»، «كۇتەمىن»، «Lalala» سياقتى اندەرىنىڭ اۆتورى.
قۋات ءابىلدىڭ مالىمدەمەسىنە سايكەس، باستاپقى كەزەڭدە ول ماتەريالدىق پايدادان بۇرىن كاسىبي تانىمالدىلىقتى ماقسات تۇتقان. الايدا اندەر حيتكە اينالىپ، كوممەرتسيالىق تابىس اكەلە باستاعاندا، اۆتور مەن ورىنداۋشى اراسىنداعى قارجىلىق ماسەلەلەر رەتتەلمەگەن.
«بايانسۇلۋمەن العاشىندا كەلىسكەن كەزدە «ماعان اقشا كەرەك ەمەس، اتىم شىقسا بولدى» دەپ ايتقان ەدىم. بىراق نەگىزگى ماسەلە مەنىڭ ەڭبەگىمە تيەسىلى قالاماقى تولەنگەن جوق. مەن ءىس جۇزىندە تەگىن جۇمىس ىستەدىم»، – دەيدى كومپوزيتور.
بۇعان دەيىن تاراپتار اراسىنداعى تۇسىنىسپەۋشىلىك سالدارىنان ءانشىنىڭ YouTube-ارناسىنداعى بىرنەشە بەينەبايانى بۇعاتتالىپ، ورىنداۋعا تىيىم سالىنعان بولاتىن. كەيىننەن ۋاقىتشا كەلىسىم ارقىلى كونتەنت قايتا جۇكتەلگەن.
داۋدىڭ جاڭا كەزەڭى Bayansulu پروديۋسەرلىك ورتالىعىن اۋىستىرعاننان كەيىن باستالدى. قۋات ءابىل جاڭا كوماندادان اۆتورلىق گونورارىن تالاپ ەتكەنىمەن، ماسەلەنى بەيبىت شەشۋدىڭ ورنىنا سوتقا شاقىرۋ العانىن جەتكىزدى.
بەس بالانىڭ اكەسى ەكەنىن العا تارتقان كومپوزيتور جاعدايدى تەك جەكە باسىنىڭ ماسەلەسى ەمەس، ەلدەگى اۆتورلىق قۇقىقتىڭ قورعالۋ دەڭگەيىنىڭ كورسەتكىشى دەپ سانايدى.
«كومەك سۇراپ كەلگەندە بارىمدى سالدىم. ال تانىمال بولعاننان كەيىنگى قارىم-قاتىناس وسىنداي. مۇندايدا ادىلدىك قايدا؟»، – دەپ تۇيىندەدى ول ءوز ۆيدەوۇندەۋىندە.
ازىرگە ءانشى Bayansulu نەمەسە ونىڭ جاڭا كومانداسى تاراپىنان ايىپتاۋلارعا قاتىستى رەسمي جاۋاپ بەرىلگەن جوق
