فوتو: nytimes.com
شەشەنستان اۋماعىندا نوسەر جاۋىنعا بايلانىستى توتەنشە جاعداي رەجيمى ەنگىزىلدى. ءتيىستى جارلىققا جەكسەنبى كۇنى ايماق باسشىسى رامزان قادىروۆ قول قويدى. بۇل تۋرالى DW اگەنتتىگى جازدى، دەپ حابارلايدى "ادىرنا".
اقپاراتشا سايكەس، قاتتى جاۋىن-شاشىن سالدارىنان ايماقتا ەلەكتر جارىعى ءۇزىلىپ، كوپىرلەرگە زاقىم كەلگەن. سونىمەن قاتار ايماقتا سۋ باسۋ مەن كوشكىن جاعدايلارى دا تىركەلدى. 27 ناۋرىزدان بەرى ءبىر عانا شالي مۋنيتسيپالدى اۋدانىندا 1262 ءۇي، ال گۋدەرمەس اۋدانىندا 748 ءۇيدى سۋ باسقان. 29 ناۋرىز كۇنى كەشكى ۋاقىتتا تجم ايماقتىق بولىمشەسىنىڭ قۇتقارۋشىلارى 557 ۇيدەن سۋ شىعارعان.
شەشەنستان ۇكىمەتى توراعاسىنىڭ ورىنباسارى احمەد دۋداەۆتىڭ سوزىنشە، رەسپۋبليكادا 30-عا جۋىق جول مەن ءبىر بوگەت شايىلىپ كەتكەن. بۇدان باسقا 17 كوپىر، 5 گاز قۇبىرى جانە 6 ترانسفورماتور زاقىمدانعان. گروزنىي جانە شالي قالالارىنىڭ بىرنەشە اۋدانى، سونداي-اق نادتەرەچنىي اۋدانى مەن نوجاي-يۋرتوۆ اۋدانىنىڭ ءبىر بولىگى جارىقسىز وتىر.
بۇعان دەيىن كۋندۋحوۆو كەنتى مەن براگۋنى اۋىلىنان 1109 ادامنىڭ ەۆاكۋاتسيالانعانى بەلگىلى بولدى. اتالمىش ەلدى مەكەندەردى نوسەر جاۋىن مەن وزەندەردەگى سۋ دەڭگەيىنىڭ كوتەرىلۋى سالدارىنان سۋ باسقان.
