قازاقستاننىڭ ەنەرگەتيكا مينيسترلىگى نوۆورەسەي پورتىندا بولعان وقيعاعا بايلانىستى جاعدايدى باقىلاۋدا ۇستاپ وتىرعانىن مالىمدەدى. بۇعان دەيىن «شەسحاريس» تەرمينالىنا دروندار شابۋىل جاساعانى حابارلانعان ەدى، دەپ جازادى «ادىرنا».
ۆەدومستۆونىڭ مالىمەتىنشە، قازىرگى تاڭدا قازاقستاندىق مۇناي ەكسپورتىنا ەشقانداي اسەر تىركەلمەگەن.
«بۇگىندە ماگيسترالدىق مۇناي قۇبىرلارى جۇيەسى ارقىلى قازاقستاندىق شيكىزاتتى قابىلداۋ جانە تاسىمالداۋ شتاتتىق رەجيمدە جۇزەگە اسىرىلۋدا. ەكسپورتتىق جوسپارلار كەستەگە ساي ورىندالىپ جاتىر»، – دەدى ەنەرگەتيكا ءمينيسترىنىڭ كەڭەسشىسى، رەسمي وكىل اسەل سەرىكباەۆا.
رەسەيلىك باق دەرەگىنشە، 5 ءساۋىر كۇنى ۇشقىشسىز ۇشۋ اپپاراتتارى رەسەيدىڭ كراسنودار ولكەسىنە بىرقاتار شابۋىل جاساعان. ەڭ كوپ زارداپ شەككەن قالا – نوۆورەسەي. وندا سەگىز ادام جارالانعان.
شابۋىلدىڭ نەگىزگى نىسانى – «شەسحاريس» مۇناي تەرمينالى. بۇل نىسان رەسەيدىڭ وڭتۇستىگىندەگى مۇناي مەن مۇناي ونىمدەرىن قايتا تيەۋگە ارنالعان ەڭ ءىرى كەشەندەردىڭ ءبىرى سانالادى جانە نوۆوروسسيسك تەڭىز پورتى ءۇشىن ستراتەگيالىق ماڭىزعا يە.
اتالعان تەرمينال ارقىلى قازاقستاندىق مۇناي ءترانزيتى جۇزەگە اسىرىلادى. الايدا ەكسپورتتىڭ نەگىزگى بولىگى نوۆوروسسيسكىدە ورنالاسقان كاسپي قۇبىر كونسورتسيۋمىنىڭ تەڭىز تەرمينالى ارقىلى جونەلتىلەدى.
