قازاقستان، وزبەكستان جانە ازەربايجان بىرىگىپ، كاسپي تەڭىزىنىڭ تۇبىمەن ەلەكتر كابەلىن تارتۋ جوباسىن قولعا الادى، دەپ حابارلايدى “ادىرنا” ۇلتتىق پورتالى.
باق دەرەگىنشە، جوبا ىسكە اسسا، ورتالىق ازيادا وندىرىلگەن ەنەرگيا ازەربايجان ارقىلى ەۋروپاعا جەتكىزىلەدى.
سەناتتا قازاقستان مەن وزبەكستاننىڭ وزىندە ەلەكتر تاپشىلىعى بار ەكەنى تالقىلاندى. ياعني، سىرتقا ەنەرگيا ەكسپورتتاۋ ءۇشىن الدىمەن ىشكى سۇرانىستى جابۋ قاجەت.
ەنەرگەتيكا ۆيتسە-ءمينيسترى سانجار جاركەشوۆتىڭ ايتۋىنشا، الداعى جىلدارى بۇل ماسەلە كەزەڭ-كەزەڭىمەن شەشىلەدى. قازاقستان 2032 جىلعا دەيىن قۋاتى شامامەن 26 گۆت بولاتىن جاڭا ەنەرگەتيكالىق جوبالاردى ىسكە قوسۋدى جوسپارلاپ وتىر. ونىڭ ىشىندە 6 گۆت-قا جۋىعى جاڭارتىلاتىن ەنەرگيا كوزدەرى بولادى.
جوسپار بويىنشا، وزبەكستاندا وندىرىلگەن ەنەرگيا الدىمەن قازاقستانعا جەتكىزىلەدى. كەيىن كاسپي تەڭىزى ارقىلى ازەربايجانعا ءوتىپ، ودان ءارى ەۋروپا نارىعىنا شىعادى. بۇل باعىت ترانسكاسپي ەنەرگەتيكالىق ءدالىزى رەتىندە قاراستىرىلىپ وتىر.
ساراپشىلاردىڭ ايتۋىنشا، الداعى 5–7 جىلدا قازاقستان مەن وزبەكستاندا «جاسىل» ەنەرگيا ءوندىرىسى ايتارلىقتاي وسەدى. سونىڭ ارقاسىندا تەك ىشكى سۇرانىستى قامتاماسىز ەتىپ قانا قويماي، ەكسپورتتىق الەۋەت تە قالىپتاسۋى مۇمكىن
