ورمۇز بۇعازى ماڭىنداعى شيەلەنىس ازەربايجان مەن قازاقستانعا دەگەن قىزىعۋشىلىقتى ارتتىرۋدا. بۇل تۋرالى The Washington Times جازدى، دەپ حابارلايدى «ادىرنا» ءتىلشىسى.
«يراننىڭ قوقان-لوققىلارى مەن سوڭعى اپتالاردا ورمۇز بۇعازىنداعى كەمە قاتىناسىن بۇزۋعا باعىتتالعان ارەكەتتەرى الەمدىك نارىقتاردى تۇراقسىزداندىرىپ، مۇناي باعاسىنىڭ وسۋىنە سەبەپ بولدى جانە ايماق ەلدەرىن جەتكىزىلىمنىڭ بالاما باعىتتارىن شۇعىل ىزدەۋگە ءماجبۇر ەتتى. مۇنداي جاعدايدا بالامالى ەنەرگيا كوزدەرى مەن كولىك باعىتتارىن دامىتۋ ەرەكشە وزەكتىلىككە يە بولۋدا»،-دەلىنگەن حابارلامادا.
باسىلىم كاسپي تەڭىزىنىڭ كوپتىڭ نازارىندا ەكەنىن اتاپ ءوتتى. الەمدىك وندىرۋدەگى ۇلەسى سالىستىرمالى تۇردە از بولعانىنا قاراماستان، ايماقتىڭ الەۋەتى زور ەكەنى ايتىلدى.
«قازاقستان مەن ازەربايجان بىرلەسىپ تاۋلىگىنە 2 ملن باررەلدەن استام مۇناي وندىرەدى جانە ءتيىستى ىنتالاندىرۋلار بولعان جاعدايدا باتىس نارىعىنا جەتكىزىلىم كولەمىە ارتتىرا الادى»،-دەپ جازدى شەتەلدىك باق.
نەگىزگى ينفراقۇرىلىمدىق ەلەمەنت رەتىندە شىعىس ازيانى ورتالىق ازيا، كاسپي ءوڭىرى جانە وڭتۇستىك كاۆكاز ارقىلى ەۋروپامەن بايلانىستىراتىن ورتا ءدالىز قاراستىرىلۋدا. باسىلىم مالىمەتىنشە، بۇل باعىت رەسەي ارقىلى وتەتىن سولتۇستىك مارشرۋتتارعا جانە ورمۇز بۇعازى سياقتى تار وتكەلدەردەگى تاۋەكەلدەرگە تاۋەلدى وڭتۇستىك باعىتتارعا بالاما رەتىندە ۇسىنىلادى.
قوسىمشا فاكتور رەتىندە يران مەن ازەربايجان اراسىنداعى قاتىناستاردىڭ شيەلەنىسۋى اتالدى. سوعىس بارىسىندا ازەربايجاننىڭ ناحچىۆان وڭىرىنە يراندىق دروندار شابۋىل جاساعان. وسى جاعداي اياسىندا ماقالا اۆتورى باكۋدىڭ باتىسپەن ودان ءارى جاقىنداسۋى مۇمكىن ەكەنىن ايتتى.
