قىتاي يرانعا اسكەري كومەك كورسەتىپ جاتقان جوق. بۇل تۋرالى ەلدىڭ سىرتقى ىستەر مينيسترلىگىنىڭ وكىلى لين تسزياننىڭ ح الەۋمەتتىك جەلىسىندە ايتتى، دەپ حابارلايدى «ادىرنا» ءتىلشىسى.
«قىتاي يرانعا اسكەري قولداۋ كورسەتتى دەپ ايىپتايتىن باق حابارلامالارى تولىقتاي قولدان جاسالعان»، – دەلىنگەن مالىمدەمەدە.
سونداي-اق مينيسترلىكتىڭ رەسمي وكىلى پەكيننىڭ ۆاشينگتون ارەكەتتەرىنە جاۋاپ بەرۋى مۇمكىن ەكەنىن ەسكەرتتى.
«ەگەر اقش وسى ايىپتاۋلارعا سۇيەنە وتىرىپ قىتايعا قارسى تاريفتەردى ارتتىرۋدى جالعاستىرسا، ەلىمىز قارسى شارالارمەن جاۋاپ بەرەدى»، – دەدى ول.
بۇعان دەيىن باتىس بۇقارالىق اقپارات قۇرالدارى اقش بارلاۋ دەرەكتەرىنە سىلتەمە جاساپ، قىتايدىڭ يرانعا اۋە قورعانىس جۇيەلەرىن، سونىڭ ىشىندە ءپورتاتيۆتى زەنيتتىك-زىمىران كەشەندەرىن جەتكىزۋى مۇمكىن دەگەن اقپارات تاراتقان ەدى. بۇل حابارلامالارعا اقش پرەزيدەنتى دونالد ترامپ تا پىكىر ءبىلدىرىپ، يرانعا قارۋ-جاراق جەتكىزىلگەن جاعدايدا قىتاي ءۇشىن اۋىر سالدار بولاتىنىن ەسكەرتكەن. كەيىنىرەك ترامپ يرانعا كومەكتەسەتىن ەلدەرگە 50% تاريف ەنگىزۋى مۇمكىن ەكەنىن ايتقان. بۇل شەكتەۋلەرگە، اتاپ ايتقاندا، قىتاي دا ىلىگۋى ىقتيمال.
