بەلگىلى اكتەر، جايدارمانشى، «ميلليون» كومانداسىنىڭ مۇشەسى مانسار ورىنحان تۇركىستان وبلىسى كۇرەس فەدەراتسياسىنىڭ ۆيتسە-پرەزيدەنتى قىزمەتىنە تاعايىندالدى. بۇل تۋرالى ول ءوزىنىڭ الەۋمەتتىك جەلىدەگى پاراقشاسىندا جازدى، دەپ حابارلايدى "ادىرنا".
«بۇل – مەن ءۇشىن ۇلكەن جاۋاپكەرشىلىك ءارى سەنىم. كورسەتىلگەن قولداۋ ءۇشىن تۇركىستان وبلىسى كۇرەس فەدەراتسياسىنا جانە تۇركىستان وبلىسىنىڭ دەنە شىنىقتىرۋ جانە سپورت باسقارماسىنا العىسىمدى بىلدىرەمىن. باستى ماقسات – ۇلتتىق سپورتتىڭ بەدەلىن كوتەرىپ، جاس بۋىنعا موتيۆاتسيا بەرۋ. الدا ۇلكەن جۇمىستار بار. بىرگە داميمىز!» - دەدى مانسار ورىنحان الەۋمەتتىك جەلىدەگى پاراقشاسىندا.
اكتەر الداعى ۋاقىتتا كۇرەس سپورتىن كەڭىنەن ناسيحاتتاۋ، ونىڭ ءيميدجىن ارتتىرۋ جانە مەديا باعىتتى جاڭا دەڭگەيگە كوتەرۋ جولىندا بار كۇش-جىگەرىن سالماق.
“جيناقتاعان تاجىريبەم مەن شىعارماشىلىق كوزقاراسىمدى وسى سالاعا باعىتتاپ، بىرلەسە وتىرىپ ناتيجەلى جۇمىس اتقارامىز دەپ سەنەمىن. باستى ماقسات – ۇلتتىق سپورتتىڭ بەدەلىن كوتەرىپ، جاس بۋىنعا موتيۆاتسيا بەرۋ” دەيدى ول.
