3-29 ءساۋىر ارالىعىندا ليتۆانىڭ ۆيلنيۋس قالاسىندا العاش رەت European Mathematical Olympiad ءوتتى. قازاقستان ۇلتتىق قۇراماسى جوعارى ناتيجە كورسەتىپ، كوماندالىق ەسەپتە 1-ورىندى جەڭىپ الدى. بۇل تۋرالى وقۋ-اعارتۋ مينيسترلىگى جازدى، دەپ حابارلايدى «ادىرنا» ءتىلشىسى.
قۇراما قورجىنىنا 3 التىن جانە 2 كۇمىس مەدال ءتۇستى. قازاقستان قۇراماسىنىڭ بۇل جارقىن جەڭىسى حالىقارالىق ءبىلىم ارەناسىندا ەلدىڭ زياتكەرلىك الەۋەتىنىڭ جوعارى دەڭگەيىن تاعى ءبىر مارتە دالەلدەدى.
استانا قالاسىنداعى Spectrum International School-دىڭ 12-سىنىپ وقۋشىسى مارعۇلان شارەل وليمپيادانىڭ ابسوليۋت جەڭىمپازى اتاندى.
الماتى قالاسىنداعى نازارباەۆ زياتكەرلىك مەكتەبىنىڭ 11-سىنىپ وقۋشىسى ەلدار ۋسەنوۆ، الماتى قالاسىنداعى Haileybury مەكتەبىنىڭ 11-سىنىپ وقۋشىسى ەريك ليم التىن مەدال يەلەندى. ال كۇمىس مەدالدى الماتى قالاسىنداعى Nurorda مەكتەبىنىڭ وقۋشىلارى ەراسىل التىنبەك پەن ءانۋار اعىباەۆ الدى.
قۇراما جەتەكشىلەرى:
ياروسلاۆ گالبەرگ, قازاقستان-بريتان تەحنيكالىق ۋنيۆەرسيتەتىنىڭ 4-كۋرس ستۋدەنتى;
اسحات ابدىكۋلوۆ, الماتى قالاسىنداعى №165 مامانداندىرىلعان ليتسەيىنىڭ ماتەماتيكا ءپانى مۇعالىمى.
ايتا كەتەيىك، اتالعان وليمپياداعا 19 ەلدەن 21 كوماندا، جالپى سانى 126 وقۋشى قاتىستى. قاتىسۋشى مەملەكەتتەر قاتارىندا البانيا، ارمەنيا، بولگاريا، ەستونيا، فينليانديا، فرانتسيا، گرۋزيا، يسلانديا، يرلانديا، قازاقستان، كوسوۆو، لاتۆيا، ليتۆا، سولتۇستىك ماكەدونيا، نورۆەگيا، پولشا، سلوۆەنيا، شۆەيتساريا جانە ۋكراينا بار.
