گامبۋرگ تۇرعىندارىنىڭ باسىم بولىگى 31 مامىردا وتكەن رەفەرەندۋمدا قالادا وليمپيادا ويىندارىن وتكىزۋ يدەياسىن قولدامادى، دەپ حابارلايدى «ادىرنا» ءتىلشىسى DW-گە سىلتەمە جاساپ.
داۋىستاردى تۇپكىلىكتى ساناۋ اياقتالماي تۇرىپ-اق گامبۋرگتىڭ ءبىرىنشى بۋرگوميسترى پەتەر چەنچەر داۋىس بەرۋ ناتيجەسىنىڭ ايقىن ەكەنىن مالىمدەدى. سوڭعى دەرەكتەر بويىنشا، داۋىس بەرگەندەردىڭ 54,9%-ى وليمپيادا ويىندارىن وتكىزۋگە قارسى بولسا، 45,1%-ى بۇل باستامانى قولداعان.
چەنچەر گەرمانيانىڭ سپورت سالاسىنداعى رەسمي وكىلدەرىنە «گامبۋرگ وليمپيادا ويىندارىن وتكىزۋگە بەرگەن ءوتىنىمىن قايتارىپ الاتىنىن» حابارلادى. سونىمەن قاتار ول رەفەرەندۋم قورىتىندىسى بيلىك ءۇشىن مىندەتتى تۇردە ورىندالۋى ءتيىس شەشىم ەكەنىن اتاپ ءوتتى.
رەفەرەندۋمدا داۋىس بەرۋ قۇقىعىنا 16 جاستان اسقان 1 315 800 گامبۋرگ تۇرعىنى يە بولدى. سايلاۋ كوميسسياسىنىڭ مالىمەتىنشە، ولاردىڭ شامامەن 650 مىڭى نەمەسە 49,5%-ى داۋىس بەرگەن.
ەسكە سالايىق، 2015 جىلى دا قالا تۇرعىندارى وليمپياداعا ءوتىنىم بەرۋگە قارسى شىققان ەدى. سول كەزدە رەفەرەندۋمعا قاتىسقانداردىڭ 51,6%-ى قارسى داۋىس بەرسە، 48,4%-ى قولداۋ بىلدىرگەن.
گامبۋرگتىڭ 2036, 2040 نەمەسە 2044 جىلدارداعى جازعى وليمپيادا جانە پاراليمپيادا ويىندارىن وتكىزۋگە ارنالعان ءوتىنىمى كەرى قايتارىلعاننان كەيىن گەرمانيا اتىنان ۇمىتكەر مارتەبەسى ءۇشىن ميۋنحەن، بەرلين جانە ورتالىعى كيولن قالاسىندا ورنالاسقان رەين–رۋر ءوڭىرى باق سىنايدى. تۇپكىلىكتى شەشىمدى گەرمانيا وليمپيادالىق سپورت وداعى (DOSB) 26 قىركۇيەكتە قابىلدايدى.
