جەتىسۋ وبلىسى سارقان اۋدانىنىڭ توپولەۆكا اۋىلى ماڭىنداعى «جوڭعار-الاتاۋ» مەملەكەتتىك ۇلتتىق تابيعي پاركىنىڭ اۋماعىندا ەرەكشە تابيعي قۇبىلىسقا ارنالعان «سيۆەرس الما اعاشىنىڭ گۇلدەۋى» فەستيۆالى جوعارى ۇيىمداستىرۋشىلىق دەڭگەيدە ءوتتى.
اۋقىمدى ءىس-شارا ءوڭىردىڭ تۋريستىك الەۋەتىن ارتتىرۋعا، ەكولوگيالىق ءتۋريزمدى دامىتۋعا، تابيعي مۇرانى ناسيحاتتاۋعا جانە الەمدىك ماڭىزعا يە سيۆەرس جابايى الماسىنىڭ تابيعي قورىن ساقتاۋ مادەنيەتىن قالىپتاستىرۋعا باعىتتالدى.
فەستيۆالگە 7 مىڭنان استام ادام قاتىسىپ، ءىس-شارا اياسىندا 50-دەن استام بلوگەر مەن ينفليۋەنسەر جەتىسۋ ءوڭىرىنىڭ تۋريستىك الەۋەتىن كەڭ اۋديتورياعا تانىتۋعا ۇلەس قوستى.
ايتا كەتۋ كەرەك، جەتىسۋ وبلىسى – جەر بەتىندەگى بارلىق مادەني الما سورتتارىنىڭ ارعى تەگى سانالاتىن سيۆەرس جابايى الماسىنىڭ نەگىزگى تابيعي تارالۋ ايماقتارىنىڭ ءبىرى. عالىمداردىڭ باعالاۋىنشا، اتالعان بىرەگەي المانىڭ الەمدىك تابيعي قورىنىڭ شامامەن 48 پايىزى وسى وڭىردە شوعىرلانعان.
فەستيۆال اياسىندا قوناقتارعا گۇلدەگەن سيۆەرس الما القاپتارىن تاماشالاۋ مۇمكىندىگى ۇسىنىلىپ، pleinair فورماتىنداعى سۋرەتشىلەر بايقاۋى، مادەني-كوپشىلىك ءىس-شارالار، ۇلتتىق سپورت ويىندارى، قولونەرشىلەر كورمەسى، شەبەرلىك ساعاتتارى جانە كونتسەرتتىك باعدارلاما ۇيىمداستىرىلدى.
باعدارلامانىڭ ماڭىزدى بولىگىنىڭ ءبىرى حالىقارالىق شىعارماشىلىق جوبا بولدى. ونىڭ اياسىندا رەسەي، قىتاي، وزبەكستان، قىرعىزستان، تۇركيا جانە قازاقستاننان كەلگەن سۋرەتشىلەر ءوز تۋىندىلارىن ۇسىنىپ، كورمە قورىتىندىسى بويىنشا مادەني بايلانىستاردى دامىتۋعا جانە ءوڭىردىڭ تابيعي مۇراسىن ونەر ارقىلى ناسيحاتتاۋعا قوسقان ۇلەسى ءۇشىن ماراپاتتالدى.
فەستيۆالدىڭ باستى مۋزىكالىق قوناقتارى – قازاقستاندىق ورىنداۋشىلار Bayansulu مەن قۋاندىق راحىم ونەر كورسەتىپ، مەرەكەلىك كەشتىڭ شىرايىن اشا ءتۇستى.
قازاقستاننىڭ رەسپۋبليكالىق ءىس-شارالار كۇنتىزبەسىنە ەنگەن فەستيۆال ءوڭىردىڭ تۋريستىك ءيميدجىن نىعايتۋعا، ىشكى جانە كەلۋ ءتۋريزمىن دامىتۋعا، سونداي-اق جەتىسۋدىڭ بىرەگەي تابيعي الەۋەتىن حالىقارالىق دەڭگەيدە ىلگەرىلەتۋگە ىقپال ەتەتىن ماڭىزدى مادەني-تۋريستىك الاڭ رەتىندەگى ماڭىزىن تاعى ءبىر مارتە ايقىندادى.
