جەتىسۋ وبلىسىنىڭ الاكول اۋدانىندا اۆتوجول جوندەۋ جۇمىستارىنىڭ ساپاسىنا قاتىستى داۋ تۋدى، دەپ حابارلايدى “ادىرنا”.
جەلىدە جۇمىسشىلاردىڭ جولداعى شۇڭقىردى بالشىقپەن تولتىرعانداي ۆيدەوسى تاراعان. بۇل جاعدايعا اۋدان اكىمدىگى تۇسىنىكتەمە بەردى.
ۆيدەو اۆتورىنىڭ ايتۋىنشا، جۇمىسشىلار ارقارلى اۋىلىنا باراتىن جولداعى تەرەڭ شۇڭقىرلاردى كۇرەكپەن توپىراق سالىپ تولتىرعان. ونىڭ سوزىنشە، مۇنداي جوندەۋ جۇمىستارى العاشقى جاڭبىر مەن قاردان كەيىن قايتا بۇزىلىپ، جۇرگىزۋشىلەرگە قاۋىپ ءتوندىرۋى مۇمكىن.
«تەحنولوگيالار دامىعان زاماندا بالشىقپەن جول جوندەپ جاتىر. العاشقى جاڭبىر مەن قاردان كەيىن بۇل جۇمىستار شايىلىپ، شۇڭقىرلار قايتا پايدا بولادى»، – دەدى ۆيدەو اۆتورى.
جازبا الەۋمەتتىك جەلىدە قىزۋ تالقىلانىپ، جەرگىلىكتى تۇرعىندار جول جوندەۋ جۇمىستارىنىڭ ساپاسىنا قاتىستى سۇراق كوتەردى. قوعام بەلسەندىلەرى وبلىس پروكۋراتۋراسىنان جاعدايدى تەكسەرىپ، ءتيىستى شارا قابىلداۋدى سۇرادى.
الاكول اۋدانى اكىمدىگىنىڭ مالىمەتىنشە، ارقارلى اۋىلىنا باراتىن وبلىستىق ماڭىزى بار اۆتوجولدىڭ 39–59-شاقىرىم ارالىعىن ورتاشا جوندەۋ 2026–2027 جىلدارعا جوسپارلانعان.
ال قازىر جۇرگىزىلىپ جاتقان جۇمىستاردى مەردىگەر ۇيىم ءوز قاراجاتى ەسەبىنەن اتقارىپ جاتىر. اكىمدىك مۇنىڭ قىسقى كەزەڭدە جول قوزعالىسى قاۋىپسىزدىگىن قامتاماسىز ەتۋگە باعىتتالعانىن ايتتى.
«قازىرگى ۋاقىتتا “جەتىسۋ جول قۇرىلىس” جشس مەردىگەرلىك ۇيىمى قىسقى كەزەڭدە جول قوزعالىسى قاۋىپسىزدىگىن قامتاماسىز ەتۋ ماقساتىندا ءوز قاراجاتى ەسەبىنەن شۇڭقىرلاردى قاتتى جابىنمەن (قگق) تولتىرۋ جۇمىستارىن جۇرگىزىپ جاتىر. اتالعان ۋچاسكەنى ورتاشا جوندەۋ جۇمىستارى 2027 جىلى قولايلى اۋا رايى جاعدايىندا، جوبالاۋ-سمەتالىق قۇجاتتاماعا سايكەس ورىندالادى»، – دەلىنگەن اۋدان اكىمدىگىنىڭ حابارلاماسىندا.
