Jetısu oblysynyŋ Alaköl audanynda avtojol jöndeu jūmystarynyŋ sapasyna qatysty dau tudy, dep habarlaidy “Adyrna”.
Jelıde jūmysşylardyŋ joldaǧy şūŋqyrdy balşyqpen toltyrǧandai videosy taraǧan. Būl jaǧdaiǧa audan äkımdıgı tüsınıkteme berdı.
Video avtorynyŋ aituynşa, jūmysşylar Arqarly auylyna baratyn joldaǧy tereŋ şūŋqyrlardy kürekpen topyraq salyp toltyrǧan. Onyŋ sözınşe, mūndai jöndeu jūmystary alǧaşqy jaŋbyr men qardan keiın qaita būzylyp, jürgızuşılerge qauıp töndıruı mümkın.
«Tehnologiialar damyǧan zamanda balşyqpen jol jöndep jatyr. Alǧaşqy jaŋbyr men qardan keiın būl jūmystar şaiylyp, şūŋqyrlar qaita paida bolady», – dedı video avtory.
Jazba äleumettık jelıde qyzu talqylanyp, jergılıktı tūrǧyndar jol jöndeu jūmystarynyŋ sapasyna qatysty sūraq köterdı. Qoǧam belsendılerı oblys prokuraturasynan jaǧdaidy tekserıp, tiıstı şara qabyldaudy sūrady.
Alaköl audany äkımdıgınıŋ mälımetınşe, Arqarly auylyna baratyn oblystyq maŋyzy bar avtojoldyŋ 39–59-şaqyrym aralyǧyn ortaşa jöndeu 2026–2027 jyldarǧa josparlanǧan.
Al qazır jürgızılıp jatqan jūmystardy merdıger ūiym öz qarajaty esebınen atqaryp jatyr. Äkımdık mūnyŋ qysqy kezeŋde jol qozǧalysy qauıpsızdıgın qamtamasyz etuge baǧyttalǧanyn aitty.
«Qazırgı uaqytta “Jetısu Jol Qūrylys” JŞS merdıgerlık ūiymy qysqy kezeŋde jol qozǧalysy qauıpsızdıgın qamtamasyz etu maqsatynda öz qarajaty esebınen şūŋqyrlardy qatty jabynmen (QGQ) toltyru jūmystaryn jürgızıp jatyr. Atalǧan uchaskenı ortaşa jöndeu jūmystary 2027 jyly qolaily aua raiy jaǧdaiynda, jobalau-smetalyq qūjattamaǧa säikes oryndalady», – delıngen audan äkımdıgınıŋ habarlamasynda.
