فوتو: جۇماباي مۇسابەكوۆ
بۇگىن جەتىسۋ وبلىسىندا «BIKEN FEST» IV حالىقارالىق تەاتر فەستيۆالى باستالدى. فەستيۆالعا بيىل تۇركيا، گرۋزيا، وزبەكستان مەملەكەتتەرىنەن جانە ەل ايماقتارىنان 8 تەاتر قاتىسىپ وتىر، دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
الدىمەن تالدىقورعانداعى بيكەن ريموۆا اتىنداعى اكادەميالىق دراما تەاترى عيماراتىنىڭ الدىندا فەستيۆالعا قاتىسۋشى تەاترلاردىڭ شەرۋى ۇيىمداستىرىلدى. مۇنان سوڭ تەاتر عيماراتىنىڭ زالىندا فەستيۆال كۇندەلىگىنەن ەستەلىك بەينەجازبا كورسەتىلدى.
سالتاناتتى شارانى قۇتتىقتاۋ سوزىمەن اشقان وبلىس اكىمىنىڭ ورىنباسارى دياس ەسداۋلەتوۆ ءداستۇرلى تەاتر مەرەكەسىنىڭ جەتىسۋ وڭىرىندە وسىمەن ءتورتىنشى جىل قاتارىنان وتكىزىلىپ وتىرعانىن ايتتى.
- قادىرلى قوناقتار مەن قاتىسۋشىلار، جەر ءجانناتى جەتىسۋعا قوش كەلدىڭىزدەر! «BIKEN FEST» فەستيۆالى العاش رەت 2023 جىلى قازاقستاننىڭ حالىق ءارتىسى بيكەن ريموۆانىڭ 100 جىلدىق مەرەيتويىنا وراي ۇيىمداستىرىلىپ، جەتىسۋ ءوڭىرىنىڭ مادەني ءيميدجىن نىعايتاتىن ماڭىزدى جوباعا اينالدى. وسى 4 جىل ىشىندە بۇل ءىس-شاراعا 6 مەملەكەتتەن جانە ەلىمىزدىڭ وڭىرلەرىنەن بارلىعى 36 تەاتر قاتىستى. بيىل دا وسى فەستيۆالعا ارنايى شەتەلدەن جانە ەلىمىزدەن 8 تەاتر كەلىپ وتىر. بارشا تەاتر ۇجىمدارىن وبلىس اكىمىنىڭ اتىنان قۇتتىقتاپ، شىعارماشىلىق تابىس تىلەيمىن! ونەرىمىز وركەندەي بەرسىن! – دەدى ول.
مۇنان سوڭ كورەرمەندەرگە د.راقىشەۆ اتىنداعى وبلىستىق فيلارمونيانىڭ مۇقان تولەباەۆ اتىنداعى حالىق اسپاپتار وركەسترىنىڭ كونتسەرتى ۇسىنىلدى.
تەاتر فەستيۆالى تۋرالى قازىلار القاسىنىڭ توراعاسى قازاقستاننىڭ ەڭبەك سىڭىرگەن قايراتكەرى، مۇحتار اۋەزوۆ اتىنداعى قازاق ۇلتتىق دراما تەاترىنىڭ ديرەكتورى ەركىن جۋاسبەك پىكىرىن ءبىلدىردى:
- ەلىمىزدە وتەتىن وسىنداي ونشاقتى تەاتر فەستيۆالى بار. ولاردىڭ ءبارى دە قازاق ساحنا ونەرىنىڭ ءوسىپ-جەتىلۋىنە سەپتىگىن تيگىزىپ جاتىر. سونىڭ ءبىرى ۇزىلمەي جىل سايىن جەتىسۋ جەرىندە وتكىزىلىپ وتىرعانى ءبىزدى قۋانتادى. بۇل تەك كاسىبي ساحناگەرلەرگە عانا ەمەس، كورەرمەندەر ءۇشىن دە قىزىق شارا دەپ ويلايمىن. سەبەبى كەز كەلگەن كورەرمەننىڭ تۇركياعا، گرۋزياعا بارىپ، سپەكتاكل كورىپ قايتۋعا مۇمكىندىگى بولا بەرمەيدى. وعان قوسا ۇلتتىق ونەردى دامىتۋ دەگەن ءبىر شەڭبەردە قالۋ ەمەس، ول مادەني الماسۋلار، رۋحاني بايلانىستار ارقىلى تولىعا تۇسەدى، تاجىريبە الماسۋ ارقىلى ءوسىپ-جەتىلىپ وتىرادى، - دەدى ول.
سول سياقتى گرۋزيانىڭ باتۋمي قالاسىنان كەلگەن تەاتر ۇجىمىنىڭ وكىلدەرى دە وي قوستى.
- ءبىز قازاقستانعا تۇڭعىش رەت كەلىپ وتىرمىز. ەرتەڭ «دجازدا تەك قانا قىزدار» اتتى مۋزىكالىق قويلىمىن ساحنالايمىز. جالپى تەاتر ۇجىمىنان 40-تان استام، سونىڭ ىشىندە 19 اكتەر كەلدىك. ءبىر اتاپ وتەرلىگى، ەرتەڭ 26 مامىر گرۋزيانىڭ تاۋەلسىزدىك كۇنى مەرەكەسى. سوعان وراي ەرتەڭ جەتىسۋلىق كورەرمەنگە ونەر كورسەتەمىز، ياعني ەرتەڭ ءبىز ءۇشىن مەرەكەلىك قۋانىش ەسەلەنە تۇسەدى، - دەدى ي. چاۆچاۆادزە اتىنداعى باتۋمي مەملەكەتتىك دراما تەاترىنىڭ اكتەرى لەۆان تەدورادزە.
اتاپ وتسەك، «BIKEN FEST» IV حالىقارالىق تەاتر فەستيۆالى 29 مامىرعا دەيىن جالعاسادى. بەس كۇن بويى تەاتر ساحناسىندا تۇركيانىڭ Painted bird تەاترى، وزبەكستاننىڭ قاشقاداريا وبلىستىق مۋزىكالىق دراما تەاترى، گرۋزيانىڭ ي. چاۆچاۆادزە اتىنداعى باتۋمي مەملەكەتتىك دراما تەاترى، مەملەكەتتىك اكادەميالىق قۋىرشاق تەاترى، جاستار تەاترى، ن. ءجانتورين اتىنداعى ماڭعىستاۋ وبلىستىق مۋزىكالىق دراما تەاترى، تۇركىستان مۋزىكالىق دراما تەاترى، شىعىس قازاقستان وبلىستىق دراما جانە وپەرەتتا تەاترى ونەر كورسەتەدى.
