Foto: Jūmabai Mūsabekov
Bügın Jetısu oblysynda «BIKEN FEST» IV Halyqaralyq teatr festivalı bastaldy. Festivalǧa biyl Türkiia, Gruziia, Özbekstan memleketterınen jäne el aimaqtarynan 8 teatr qatysyp otyr, dep habarlaidy Jetısu oblysy äkımınıŋ baspasöz qyzmetı.
Aldymen Taldyqorǧandaǧy Biken Rimova atyndaǧy akademiialyq drama teatry ǧimaratynyŋ aldynda festivalǧa qatysuşy teatrlardyŋ şeruı ūiymdastyryldy. Mūnan soŋ teatr ǧimaratynyŋ zalynda festival kündelıgınen estelık beinejazba körsetıldı.
Saltanatty şarany qūttyqtau sözımen aşqan oblys äkımınıŋ orynbasary Dias Esdäuletov dästürlı teatr merekesınıŋ Jetısu öŋırınde osymen törtınşı jyl qatarynan ötkızılıp otyrǧanyn aitty.
- Qadırlı qonaqtar men qatysuşylar, jer jännaty Jetısuǧa qoş keldıŋızder! «BIKEN FEST» festivalı alǧaş ret 2023 jyly Qazaqstannyŋ Halyq ärtısı Biken Rimovanyŋ 100 jyldyq mereitoiyna orai ūiymdastyrylyp, Jetısu öŋırınıŋ mädeni imidjın nyǧaitatyn maŋyzdy jobaǧa ainaldy. Osy 4 jyl ışınde būl ıs-şaraǧa 6 memleketten jäne elımızdıŋ öŋırlerınen barlyǧy 36 teatr qatysty. Biyl da osy festivalǧa arnaiy şetelden jäne elımızden 8 teatr kelıp otyr. Barşa teatr ūjymdaryn oblys äkımınıŋ atynan qūttyqtap, şyǧarmaşylyq tabys tıleimın! Önerımız örkendei bersın! – dedı ol.
Mūnan soŋ körermenderge D.Raqyşev atyndaǧy oblystyq filarmoniianyŋ Mūqan Tölebaev atyndaǧy halyq aspaptar orkestrınıŋ konsertı ūsynyldy.
Teatr festivalı turaly qazylar alqasynyŋ töraǧasy Qazaqstannyŋ eŋbek sıŋırgen qairatkerı, Mūhtar Äuezov atyndaǧy Qazaq ūlttyq drama teatrynyŋ direktory Erkın Juasbek pıkırın bıldırdı:
- Elımızde ötetın osyndai onşaqty teatr festivalı bar. Olardyŋ bärı de qazaq sahna önerınıŋ ösıp-jetıluıne septıgın tigızıp jatyr. Sonyŋ bırı üzılmei jyl saiyn Jetısu jerınde ötkızılıp otyrǧany bızdı quantady. Būl tek käsıbi sahnagerlerge ǧana emes, körermender üşın de qyzyq şara dep oilaimyn. Sebebı kez kelgen körermennıŋ Türkiiaǧa, Gruziiaǧa baryp, spektakl körıp qaituǧa mümkındıgı bola bermeidı. Oǧan qosa ūlttyq önerdı damytu degen bır şeŋberde qalu emes, ol mädeni almasular, ruhani bailanystar arqyly tolyǧa tüsedı, täjıribe almasu arqyly ösıp-jetılıp otyrady, - dedı ol.
Sol siiaqty Gruziianyŋ Batumi qalasynan kelgen teatr ūjymynyŋ ökılderı de oi qosty.
- Bız Qazaqstanǧa tūŋǧyş ret kelıp otyrmyz. Erteŋ «Djazda tek qana qyzdar» atty muzykalyq qoilymyn sahnalaimyz. Jalpy teatr ūjymynan 40-tan astam, sonyŋ ışınde 19 akter keldık. Bır atap öterlıgı, erteŋ 26 mamyr Gruziianyŋ täuelsızdık künı merekesı. Soǧan orai erteŋ jetısulyq körermenge öner körsetemız, iaǧni erteŋ bız üşın merekelık quanyş eselene tüsedı, - dedı İ. Chavchavadze atyndaǧy Batumi memlekettık drama teatrynyŋ akterı Levan Tedoradze.
Atap ötsek, «BIKEN FEST» IV Halyqaralyq teatr festivalı 29 mamyrǧa deiın jalǧasady. Bes kün boiy teatr sahnasynda Türkiianyŋ Painted bird teatry, Özbekstannyŋ Qaşqadariia oblystyq muzykalyq drama teatry, Gruziianyŋ İ. Chavchavadze atyndaǧy Batumi memlekettık drama teatry, Memlekettık akademiialyq quyrşaq teatry, Jastar teatry, N. Jantörin atyndaǧy Maŋǧystau oblystyq muzykalyq drama teatry, Türkıstan muzykalyq drama teatry, Şyǧys Qazaqstan oblystyq drama jäne operetta teatry öner körsetedı.
