فوتو: ۇوك
قىتايدىڭ سيان قالاسىندا ءوتىپ جاتقان كوركەم جۇزۋدەن الەم كۋبوگىنىڭ كەزەڭىندە قازاقستان قۇراماسى ءساتتى ونەر كورسەتۋىن جالعاستىرۋدا. جارىستىڭ ەكىنشى كۇنى وتانداستارىمىز قورجىنعا تاعى ءۇش مەدال سالدى.
ەرلەر اراسىنداعى ەركىن باعدارلامادا ۆيكتور درۋزين 239,1226 ۇپاي جيناپ، قولا جۇلدەگە يە بولدى. ايتا كەتەرلىگى، ول جارىستىڭ العاشقى كۇنى تەحنيكالىق باعدارلامادا دا ءۇشىنشى ورىن يەلەنگەن بولاتىن.
بۇل باسەكەدە تاعى ءبىر قازاقستاندىق سپورتشى ەدۋارد كيم ۇزدىك بەستىكتى تۇيىندەدى. التىندى قىتايلىق مۋە گو (263,2338) يەلەنسە، كۇمىستى بريتاندىق راندجۋو تومبلين (249,8225) الدى.
تەحنيكالىق باعدارلامادا ونەر كورسەتكەن ارالاس جۇپتار اراسىندا قازاقستان قۇراماسى بىردەن ەكى جۇلدەنى يەلەندى. كۇمىس جۇلدەنى ياسمينا يسلاموۆا مەن الديار رامازانوۆ جەڭىپ الدى. ال قولا مەدال ارتۋر مايدانوۆ پەن ايعانىم سايىمعا بۇيىردى.
بۇل جارىستا ۇلىبريتانيا وكىلدەرى يزابەل تورپ پەن راندجۋو تومبلين (227,1317) جەڭىمپاز اتاندى.
ايەلدەر اراسىنداعى جۇپتار باسەكەسىندە ماقپال قالمىرزا مەن پولينا مەرزلياكوۆا 12-ورىنعا تۇراقتادى. ال كوماندالىق ەركىن باعدارلامادا قازاقستاننىڭ قوس قۇراماسى التىنشى جانە جەتىنشى ورىنداردى ءبولىستى.
