2026 جىلدىڭ قاڭتار–ناۋرىز ايلارى ارالىعىندا ماڭعىستاۋ وبلىسىنداعى اۋرۋحاناعا تەرەزەدەن قۇلاپ كەتكەن سەگىز بالا جەتكىزىلگەن. ولاردىڭ ەكەۋى جوعارعى قاباتتان قۇلاۋ سالدارىنان كوز جۇمدى. بۇل تۋرالى Lada.kz جازدى، دەپ حابارلايدى “ادىرنا”.
قۇتقارۋشىلار اتا-انالاردى قاۋىپسىزدىك شارالارىن كۇشەيتۋگە، جاۋاپكەرشىلىكتى ارتتىرۋعا جانە تۇرعىن ۇيلەردەگى تەرەزەلەردى قورعاۋ تالاپتارىن قايتا قاراۋعا شاقىرادى، دەپ حابارلايدى
قۇتقارۋشىلاردىڭ ايتۋىنشا، جاز مەزگىلى جاقىنداپ كەلەدى – بۇل كەزەڭدە بالالاردىڭ قاۋىپسىزدىگىنە ەرەكشە كوڭىل ءبولۋ قاجەت.
“دەمالىس ۋاقىتىندا بالالار كوشەدە، كاسپي تەڭىزىنىڭ جاعالاۋىندا جانە ۇيدە كوپ ۋاقىت وتكىزەدى، وسىعان بايلانىستى ءتۇرلى توتەنشە جاعدايلاردىڭ قاۋپى ارتادى. سوندىقتان ءورتتىڭ الدىن الۋ، سۋداعى قاۋىپسىزدىك جانە تەرەزەدەن قۇلاۋدىڭ الدىن الۋ اسا ماڭىزدى”، - دەدى قۇتقارۋشىلار.
مامانداردىڭ ايتۋىنشا، مۇنداي جاعدايلار كوبىنە ەرەسەكتەردىڭ باقىلاۋىنىڭ جەتكىلىكسىزدىگىنەن نەمەسە قاۋىپسىزدىك ەرەجەلەرىنىڭ ساقتالماۋىنان بولادى.
ۆەدومستۆو مالىمەتىنشە، 2025 جىلدىڭ قاڭتار–جەلتوقسان ايلارى ارالىعىندا وبلىستىق بالالار اۋرۋحاناسىنا تەرەزەدەن نەمەسە بيىكتىكتەن قۇلاۋ سالدارىنان جاراقات العان 31 بالا تۇسكەن. ءبىر جاعدايدا بالا ءۇشىنشى قاباتتان قۇلاپ، قايتىس بولعان.
“زارداپ شەككەندەردىڭ كوپشىلىگىندە اۋىر جاراقاتتار – سۇيەك پەن باس سۇيەك سىنۋى، مي شايقالۋى، تراۆماتيكالىق شوك تىركەلگەن. كوبىنە قۇلاۋ 2–5 قابات بيىكتىگىنەن ورىن العان. كەي جاعدايلاردا بالالار موسكيت تورىنا سۇيەنىپ، سونىڭ سالدارىنان قايعىلى جاعدايلارعا تاپ بولعان. 2026 جىلدىڭ قاڭتار–ناۋرىز ايلارىنىڭ وزىندە «تەرەزەدەن قۇلاۋ» دياگنوزىمەن سەگىز بالا اۋرۋحاناعا جەتكىزىلدى. ونىڭ ەكەۋى جوعارعى قاباتتان قۇلاپ، قايتىس بولدى. قالعاندارى اۋىر جاعدايدا جانساقتاۋ بولىمىندە ەم قابىلداعان – ولاردا كوپ جاراقات، باس-مي جاراقاتى جانە ەسىنەن تانۋ بەلگىلەرى بولعان. بۇل دەرەكتەر قاۋىپسىزدىك شارالارىن كۇشەيتۋ، اتا-انالاردىڭ جاۋاپكەرشىلىگىن ارتتىرۋ جانە تۇرعىن ۇيلەردەگى تەرەزەلەردى قورعاۋ تالاپتارىن قايتا قاراۋ قاجەتتىگىن كورسەتەدى،” – دەيدى ماماندار.
ساراپشىلار ءاربىر ستاتيستيكالىق دەرەكتىڭ ارتىندا ءبىر بالانىڭ تاعدىرى مەن وتباسىنىڭ قايعىسى تۇرعانىن اتاپ وتەدى.
“كوپ جاعدايدا مۇنداي وقيعالار بالالاردىڭ تەرەزە جانىندا ويناۋى نەمەسە جاقىن تۇرعان جيھازعا شىعىپ كەتۋى سالدارىنان بولادى. اسىرەسە كىشكەنتاي بالالار وسال كەلەدى – ولار موسكيت تورىنا سۇيەنىپ، سىرتقا قۇلاپ كەتۋى مۇمكىن. 2025–2026 جىلدار ستاتيستيكاسى كورسەتكەندەي، ءتىپتى 2–3 قاباتتان قۇلاۋ دا ولىمگە نەمەسە مۇگەدەكتىككە اكەلۋى مۇمكىن. ەستەرىڭىزدە بولسىن: موسكيت تورى قورعانىس قۇرالى ەمەس! ول تەك جاندىكتەردەن قورعاۋعا ارنالعان جانە بالانىڭ سالماعىن كوتەرە المايدى”، – دەپ ەسكەرتەدى قۇتقارۋشىلار.
توتەنشە جاعدايلار دەپارتامەنتىنىڭ ماماندارى تەرەزەلەرگە ارنايى قورعانىس قۇرالدارىن (بلوكيراتورلار، اشىلۋىن شەكتەيتىن قۇرىلعىلار) ورناتۋدى جانە بالالاردى ەشقاشان قاراۋسىز قالدىرماۋدى ۇسىنادى.
“ەڭ باستىسى – بالالاردى ۇنەمى باقىلاۋدا ۇستاۋ. ولارعا ءورت قاۋىپسىزدىگى ەرەجەلەرىن ءتۇسىندىرىپ، سۋدا ءوزىن قاۋىپسىز ۇستاۋدى ۇيرەتىپ، تەرەزەلەردىڭ قورعالۋىن قامتاماسىز ەتۋ ماڭىزدى. بالالاردىڭ ءومىرى مەن دەنساۋلىعىن ساقتاۋدا اتا-انالاردىڭ جاۋاپكەرشىلىگى مەن قىراعىلىعى شەشۋشى ءرول اتقارادى”، – دەپ قورىتىندىلادى ۆەدومستۆو.
ەسكە سالايىق، وتكەن جىلى ءساۋىر ايىنىڭ العاشقى اپتاسىندا عانا تۇرعىن ۇيلەردىڭ تەرەزەلەرىنەن قۇلاعان ءۇش كىشكەنتاي بالا اۋرۋحاناعا جەتكىزىلگەن.
