فوتو: دميتري ەروفەەۆ
بۇگىن جەتىسۋ وبلىسىندا «جەتىسۋ» ۆولەيبول كلۋبىنىڭ 25 جىلدىعىنا وراي جانە ەرلەر مەن ايەلدەر كوماندالارىنىڭ 2025–2026 جىلعى ماۋسىمدا جوعارى ناتيجەلەر كورسەتۋىنە بايلانىستى ۆولەيبولشىلارعا قۇرمەت كورسەتىلدى. ءىس-شاراعا كەلگەن جاس سپورتشىلارعا كلۋب ويىنشىلارىنىڭ قولتاڭباسى قويىلعان 1 مىڭداي دوپ تاراتىلىپ، ماستەر كلاسس ۇيىمداستىرىلدى.
كلۋب مۇشەلەرىن وبلىس اكىمى بەيبىت يساباەۆ قۇتتىقتاپ، ماراپاتتار تاپسىردى، دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
تالدىقورعانداعى «جاستار» سپورت سارايىندا وتكەن سالتاناتتى شاراعا ۆولەيبولدان ەرلەر مەن ايەلدەر كوماندالارى جانە قوسالقى قۇرامدارى، سپورت ارداگەرلەرى، ءتۇرلى حالىقارالىق تۋرنيرلەردىڭ جەڭىمپازدارى، جاس سپورتشىلار – جالپى سانى 1500 ادام قاتىستى.
سپورتشىلاردى مەرەيلى جىلمەن جانە جەڭىستەرىمەن وبلىس اكىمى بەيبىت يساباەۆ قۇتتىقتادى. ول «جەتىسۋ» ايەلدەر كومانداسىنىڭ وسى ماۋسىمدا ونىنشى مارتە چەمپيون بولعانىن، ال ەرلەر كومانداسىنىڭ ەل چەمپيوناتىن، كۋبوگى مەن سۋپەركوبوگىن ۇتىپ العانىن تىلگە تيەك ەتىپ، بارلىق كلۋب مۇشەلەرىنە العىسىن جەتكىزدى. سول سياقتى بولاشاق سپورتشىلاردى تاربيەلەۋ ىسىنە دە نازار اۋداردى.
- بيىلعى كەزدەسۋدىڭ ءمان-ماعىناسى ءتىپتى تەرەڭ. سەبەبى وسى جىلى كاسىبي «جەتىسۋ» ۆولەيبول كلۋبىنىڭ قۇرىلعانىنا 25 جىل تولىپ وتىر. بۇل كەزەڭ جارقىن جەڭىستەرگە تولى بولدى جانە ءوز ءىسىن ادال اتقاراتىن مىقتى تۇلعالاردى قالىپتاستىردى. وسى ۋاقىت ىشىندە «جەتىسۋ» كلۋبى ءوڭىرىمىزدىڭ سپورتتىق ماقتانىشىنا، چەمپيوندار مەكتەبىنە جانە جۇيەلى دامۋدىڭ ايقىن ۇلگىسىنە اينالدى. ءبىز تەك كوماندالار دايىنداپ قانا قويمايمىز، ءبىز جىل سايىن باسەكەگە قابىلەتتى سپورتشىلاردى تاربيەلەيتىن جۇيە قالىپتاستىرىپ وتىرمىز. ءبىز الداعى ۋاقىتتا دا سپورتشىلاردى دايىنداۋعا قولايلى جاعداي جاساپ، ينفراقۇرىلىمدى جاڭعىرتىپ، كاسىبي كلۋبتار مەن بالالار مەن جاسوسپىرىمدەر سپورتىن قولداۋدى جالعاستىرامىز. ءبىزدىڭ ماقساتىمىز — بولاشاق چەمپيونداردىڭ تۋعان جەرىندە ءوسىپ-ءونۋى، - دەگەن ب. يساباەۆ مۇنان سوڭ ماراپاتتاۋ ءراسىمىن اتقاردى. اتاپ ايتقاندا، «جەتىسۋ» ۆولەيبول كلۋبىنىڭ باس جاتتىقتىرۋشىسى مارات ادرىشەۆكە «قۇرمەت» وردەنى، «جەتىسۋ» ەرلەر كومانداسىنىڭ ويىنشىسى ايبەك جاقسىلىقوۆقا، ايەلدەر كومانداسىنىڭ ويىنشىسى ۆالەريا ياكۋتيناعا پرەزيدەنتتىڭ العىسى جانە توسبەلگىسى، سول سياقتى كلۋبتىڭ بىرقاتار مۇشەلەرىنە پرەزيدەنتتىڭ العىسى، وبلىس اكىمىنىڭ العىس حاتى بەرىلدى.
ماراپاتتالۋشىلار اتىنان ءسوز العان كلۋبتىڭ باس جاتتىقتىرۋشىسى مارات ادرىشەۆ:
- بىزگە بەرىلگەن ماراپات ءۇشىن شىن جۇرەكتەن العىس ايتامىن. بۇل ءبىز ءۇشىن ۇلكەن مارتەبە جانە بولاشاقتا جاڭا جەڭىستەرگە جەتۋگە قۋات بەرەدى. ماعان سەنىم ارتقان باسشىلىققا، قولداۋ كورسەتكەن ۇجىمعا راقمەت. بۇل – ءبىزدىڭ ورتاق جەڭىسىمىز، - دەدى ول.
وسى باسقوسۋدا جاس سپورتشىلار كلۋب جاتتىقتىرۋشىلارى مەن ويىنشىلارىنا وزدەرىن قىزىقتىرعان سۇراقتارىن قويىپ، ءوزارا وي الماستى.
كەزدەسۋگە كەلگەن كلۋب مۇشەلەرىن سوزگە تارتتىق.
- ءجاسوسپىرىم كەزىمنەن وسى «جاستار» سپورت سارايىندا ءارتۇرلى جاس ساناتىندا ۆولەيبولدان جاتتىعىپ ءوستىم. 2016 جىلدان «جەتىسۋ» ۆولەيبول قۇراماسىنىڭ ساپىندا ويىشى بولدىم. كەيىن مانسابىمدى جاتتىقتىرۋشى رەتىندە جالعاستىردىم. قازىر ۇلتتىق قۇرامادا اسسيتەنت-ستاتيستيكپىن. بۇگىنگى كۇنى جەتىسۋ ۆولەيبولى جاقسى قارقىنمەن دامىپ كەلەدى. وسى ماۋسىمدا ەل چەمپيوناتىن، كۋبوگىن، سۋپەركۋبوگىن ۇتتىق. بۇل ەرلەر كومانداسىنىڭ تاريحىندا بولماعان. بۇل جەڭىسكە ءبىز جينالعان تاجىريبەنىڭ، جاسالعان قولايلى جاعدايدىڭ جانە تىنىمسىز جاتتىعۋدىڭ ارقاسىندا جەتتىك، - دەدى «جەتىسۋ» ەرلەر كومانداسىنىڭ اناليتيك-ستاتيستيگى مارلەن ايتجانوۆ.
«جاستار» سپورت سارايىندا كەلگەن وقۋشىلاردىڭ ءبىرى بالنۇر ەرلانقىزى بۇگىنگى شارانىڭ ءمان-ماڭىزى تۋرالى ءوز پىكىرىن ءبىلدىردى:
- تالدىقورعان قالاسىنداعى № 18 مەكتەپتىڭ 8 ء«ا» سىنىبىندا وقيمىن. ۆولەيبول كلۋبىنداعى ۇيىرمەگە قاتىسىپ جۇرگەنىمە 5 جىل بولدى. بۇگىنگە دەيىن بىرنەشە رەت 2012-2013 جىلعى جاسوسپىرىمدەر اراسىنداعى جارىستاردان جۇلدەلى ورىندار الدىق. «جەتىسۋ» كاسىبي ۆولەيبول كوماندالارىنىڭ چەمپيوناتتاعى ويىندارىن سايتتاردان، تەلەارنادان تاماشالاپ وتىردىق. ولار جەڭىسكە جەتكەندە ءبىز دە قۋاندىق. بۇگىنگى كەزدەسۋگە اسىعا كەلدىم، قولتاڭبا قويىلعان دوپ الدىم. مۇنداي جۇزدەسۋلەر بىزگە ۇلكەن موتيۆاتسيا بەرەدى. بولاشاقتا وسى اعا-اپكەلەرىمىز سەكىلدى مىقتى سپورتشى بولعىم كەلەدى، - دەيدى جاس ۆولەيبولشى ب. ەرلانقىزى.
كەزدەسۋ سوڭى د. راقىشەۆ اتىنداعى وبلىستىق فيلارمونيا انشىلەرىنىڭ مەرەكەلىك كونتسەرتىمەن تۇيىندەلدى.
ەسكە سالساق، 2025–2026 جىلعى ماۋسىمدا «جەتىسۋ» ۆولەيبولدان ايەلدەر كومانداسى ەل چەمپيناتىنىڭ ونىنشى مارتە چەمپيونى اتاندى. سول سياقتى جۋىردا تايلاندتا وتكەن ازيا كلۋبتىق چەمپيوناتىندا قولا جۇلدەگە يە بولدى. ال ۆولەيبولدان ەرلەر كومانداسى ەل چەمپيونى اتاندى، وعان قوسا كۋبوكتى جانە سۋپەركۋبوكتى جەڭىپ الدى.
