اباي كۇنىنە وراي جەتىسۋ وبلىسىندا «جەلسىز تۇندە جارىق اي» اتتى ادەبي-سازدى كەش ۇيىمداستىرىلىپ، جاستار مەن ادەبيەتسۇيەر قاۋىمنىڭ باسىن قوستى.
ءىس-شارانىڭ باستى ماقساتى – قازاقتىڭ ۇلى اقىنى، ويشىلى ءارى اعارتۋشىسى اباي قۇنانبايۇلىنىڭ مول رۋحاني مۇراسىن كەڭىنەن ناسيحاتتاۋ، جاستاردىڭ قازاق ادەبيەتى مەن مادەنيەتىنە دەگەن قىزىعۋشىلىعىن ارتتىرۋ، ۇلتتىق قۇندىلىقتاردى دارىپتەۋ جانە شىعارماشىل جاستاردىڭ باسىن قوسىپ، رۋحاني-مادەني ورتانى قالىپتاستىرۋ بولدى.
كەش اياسىندا قاتىسۋشىلار اباي شىعارماشىلىعىنا ارنالعان كىتاپ كورمەسى مەن ينستاللياتسيانى تاماشالاپ، ۇلتتىق ناقىشتاعى فوتوزونادا ەستەلىك سۋرەتكە ءتۇسىپ، قازاقتىڭ ءداستۇرلى تاعامدارىنان ءدام تاتتى. سونىمەن قاتار ابايدىڭ ءومىرى مەن شىعارماشىلىعىنا ارنالعان بەينەروليك كورسەتىلىپ، ادەبي كەشتىڭ مازمۇنىن تولىقتىرا ءتۇستى.
ءىس-شاراعا ارنايى شاقىرىلعان اقىندار جۇماتاي وسپانۇلى، جانگەلدى نەمەرەباەۆ، مۇحتار كۇمىسبەك جانە سانجار سۇلتانعازى قاتىسىپ، اباي مۇراسىنىڭ بۇگىنگى قوعامداعى ماڭىزى تۋرالى وي-پىكىرلەرىمەن ءبولىستى. سونداي-اق ولار ابايعا جانە جاس ۇرپاققا ارنالعان اۆتورلىق ولەڭدەرىن وقىپ، كورەرمەنگە رۋحاني اسەر سىيلادى.
كەش بارىسىندا «جەلسىز تۇندە جارىق اي» اتتى ادەبي سايىس ۇيىمداستىرىلىپ، قاتىسۋشىلار «ابايدى جالعاستىر» جانە «قارا سوزدەن تاعىلىم» كەزەڭدەرى بويىنشا بىلىمدەرىن سىنادى. سونىمەن قاتار كورەرمەندەر اراسىندا بليتس-سۇراقتار وتكىزىلىپ، بەلسەندى قاتىسۋشىلار ماراپاتتالدى.
ادەبي-سازدى كەشتىڭ كوركەمدىك بولىگىندە ابايدىڭ اندەرى ورىندالىپ، دومبىرا سۇيەمەلدەۋىمەن ادەبي-مۋزىكالىق كومپوزيتسيالار ۇسىنىلدى. تاعىلىمى مول مادەني ءىس-شارا ۇلتتىق ادەبيەت پەن ونەردى دارىپتەپ، جاستاردىڭ رۋحاني دۇنيەسىن بايىتۋعا جانە اباي مۇراسىن جاڭا قىرىنان تانىتۋعا ىقپال ەتتى.
