ايبەك دادەباي «ادىلەت» پارتياسىنىڭ توراعاسى بولىپ سايلاندى، دەپ حابارلايدى "ادىرنا" ۇلتتىق پورتالى.
7 مامىردا استانادا وتكەن «ادىلەت» ساياسي پارتياسىنىڭ قۇرىلتاي سەزىندە ايبەك دادەباي پارتيا توراعاسى بولىپ سايلاندى. بۇل شەشىم سەزد دەلەگاتتارىنىڭ داۋىس بەرۋى ارقىلى قابىلداندى.
قۇرىلتاي جيىنىندا پارتيانىڭ رەسمي قۇرىلعانى جاريالانىپ، ونىڭ جارعىسى مەن باعدارلاماسى بەكىتىلدى. سونىمەن قاتار ساياسي كەڭەس قۇرامى جاساقتالدى.
«ادىلەت» پارتياسى ءوزىن پرەزيدەنت قاسىم-جومارت توقاەۆتىڭ رەفورمالار باعىتىن قولدايتىن ساياسي ۇيىم رەتىندە تانىستىردى. پارتيا وكىلدەرىنىڭ ايتۋىنشا، ۇيىم قىزمەتى زاڭ ۇستەمدىگى، ادىلدىك قاعيداتتارى جانە مەملەكەتتىك ينستيتۋتتاردى دامىتۋ باعىتتارىنا نەگىزدەلەدى.
«ادىلدىك ۇلتتىق مەنتاليتەتتىڭ ايرىقشا بەلگىلەرىنىڭ بىرىنە اينالۋعا ءتيىس. مەملەكەت باسشىسى قاسىم-جومارت كەمەلۇلى توقاەۆ تا بۇل ماسەلەگە ۇنەمى ەرەكشە نازار اۋدارىپ كەلەدى»، – دەدى ايبەك دادەباي.
ايتا كەتەيىك، بۇعان دەيىن مەملەكەت باسشىسىنىڭ جارلىعىمەن ايبەك دادەباي قازاقستان رەسپۋبليكاسى پرەزيدەنتى اكىمشىلىگىنىڭ باسشىسى قىزمەتىنەن بوساتىلعان بولاتىن. اقوردانىڭ ءباسپاسوز حاتشىسى ايبەك سمادياروۆ پرەزيدەنت ونىڭ اتقارعان جۇمىسىنا جوعارى باعا بەرىپ، العىس بىلدىرگەنىن مالىمدەدى.
