رەسەي پرەزيدەنتى ۆلاديمير پۋتين جەڭىس كۇنىنە ارنالعان سالتاناتتى ءىس-شارالار اياسىندا ماسكەۋگە كەلگەن بىرقاتار مەملەكەت باسشىلارىمەن ەكىجاقتى كەلىسسوزدەر جۇرگىزدى. كەزدەسۋلەرگە بەلارۋس، قازاقستان جانە وزبەكستان پرەزيدەنتتەرى قاتىستى.
كرەملدىڭ رەسمي سايتى حابارلاعانداي، ۆلاديمير پۋتين جەڭىستىڭ 81 جىلدىعىنا ارنالعان سالتاناتتى ءىس-شارالارعا قاتىسۋ ءۇشىن ماسكەۋگە كەلگەن بەلارۋس رەسپۋبليكاسىنىڭ پرەزيدەنتى الەكساندر لۋكاشەنكومەن كەزدەستى.
«ەكونوميكاعا، الەۋمەتتىك ماسەلەلەرگە قاتىستى اعىمداعى تاقىرىپتار بويىنشا ءاردايىم تالقىلايتىن دۇنيەلەر بار. ساۋدا كولەمى بىزگە سىرتتان قانداي دا ءبىر قيىندىقتار تۋعىزۋعا تىرىسقانىنا قاراماستان، رەكوردتىق دەڭگەيگە جەتتى. جالپى العاندا، جاعدايىمىز تۇراقتى»، – دەدى پۋتين.
ءوز كەزەگىندە لۋكاشەنكو رەسەيلىك ارىپتەسىمەن كەزدەسۋ بارىسىندا ەكى ەل اراسىندا ىنتىماقتاستىقتا ەلەۋلى كەلىسپەۋشىلىكتەر جوق ەكەنىن مالىمدەدى.
«ەۋرازيالىق ەكونوميكالىق وداقتا، تمد كەڭىستىگىندە رەسەيدىڭ بەلارۋسپەن ساۋداسى جالپى تاۋار اينالىمىنىڭ 60–65 پايىزىن، ءتىپتى ودان دا كوپ بولىگىن قۇرايدى. ياعني، ءبىز – پوستكەڭەستىك كەڭىستىكتەگى نەگىزگى ساۋدا ارىپتەسىمىز. ارينە، مۇنداي ۇلكەن كولەمدە – شامامەن 60 ميلليارد دوللارعا جۋىق – بەلگىلى ءبىر ماسەلەلەر ارقاشان بولادى. بىراق وسى جىلدار ىشىندە ءبىز تاتۋ-ءتاتتى ءومىر ءسۇرىپ كەلەمىز، ەشقاشان ەلەۋلى داۋلار بولعان ەمەس. ءبىر-ەكى ماسەلە تۋىنداسا، ولاردى تالقىلاپ، ۇكىمەتكە رەتتەۋدى تاپسىرامىز»، – دەدى بەلارۋس پرەزيدەنتى.
ءپۋتيننىڭ توقاەۆپەن كەزدەسۋى
سونىمەن قاتار كرەملدە قازاقستان پرەزيدەنتى قاسىم-جومارت توقاەۆ پەن ۆلاديمير ءپۋتيننىڭ كەزدەسۋى ءوتتى.
قازاقستان باسشىسىنىڭ ءباسپاسوز قىزمەتى حابارلاعانداي، كەزدەسۋدە مەملەكەت باسشىلارى ەكىجاقتى كۇن تارتىبىندەگى كەڭ اۋقىمدى ماسەلەلەردى تالقىلادى. توقاەۆ رەسەي پرەزيدەنتىنىڭ الداعى مەملەكەتتىك ساپارىنا ەرەكشە نازار اۋداردى.
قازاقستان پرەزيدەنتى ەكى ەل اراسىنداعى ءوزارا ءىس-قيمىلدىڭ قارقىندى دامىپ كەلە جاتقانىن اتاپ ءوتتى.
«مەملەكەتتەرىمىز اراسىنداعى ىنتىماقتاستىققا كەلسەك، مامىر ايىنىڭ سوڭىندا وتەتىن ءسىزدىڭ مەملەكەتتىك ساپارىڭىزعا قىزۋ دايىندالىپ جاتىرمىز. سوڭعى بەس جىلدا رەسەي قازاقستان ەكونوميكاسىنا نەگىزگى ينۆەستورلاردىڭ ءبىرى بولىپ كەلەدى. ساۋدا بايلانىستارى تابىستى دامۋدا. بيىلعى جىلدىڭ قورىتىندىسى بويىنشا، بولجامعا سايكەس، تاۋار اينالىمى 30 ميلليارد دوللاردان اسادى دەپ سەنەمىز – بۇل جاقسى كورسەتكىش»، – دەدى توقاەۆ.
ءوز كەزەگىندە ۆلاديمير پۋتين قاسىم-جومارت توقاەۆتىڭ ەكى ەل اراسىنداعى قارىم-قاتىناستى نىعايتۋعا قوسقان جەكە ۇلەسىن اتاپ ءوتتى.
«بۇگىن جانە ەرتەڭ ءسىزدى كورۋ ءبىز ءۇشىن ەرەكشە قۋانىش. بۇل وقيعا توڭىرەگىندە ءتۇرلى جاعدايلارعا قاراماستان، ماسكەۋگە كەلىپ، وسى كۇندەرى رەسەيمەن بىرگە بولعانىڭىز – قازاقستان مەن رەسەي اراسىنداعى قارىم-قاتىناستىڭ قانداي دەڭگەيدە ەكەنىن ايقىن كورسەتەدى. بۇل كوپ جاعدايدا ءسىزدىڭ مەملەكەتارالىق بايلانىستاردى دامىتۋعا قوسقان جەكە ۇلەسىڭىزدىڭ ارقاسى»، – دەدى رەسەي پرەزيدەنتى.
كەزدەسۋ بارىسىندا مەملەكەت باسشىلارى وڭىرلىك جانە حالىقارالىق كۇن تارتىبىندەگى وزەكتى ماسەلەلەر بويىنشا دا پىكىر الماستى.
ءپۋتيننىڭ ميرزيوەۆپەن كەزدەسۋى
بۇدان بولەك، رەسەي پرەزيدەنتى وزبەكستان پرەزيدەنتى شاۆكات ميرزيوەۆپەن كەزدەستى.
«سوڭعى جىلدارى ەلدەرىمىز اراسىنداعى قارىم-قاتىناس، ەڭ الدىمەن، ءسىزدىڭ جەكە كۇش-جىگەرىڭىزدىڭ ارقاسىندا ەڭ جوعارى دەڭگەيدە دامىپ كەلەدى. ساۋدا كولەمى ارتىپ، ءىرى ەكونوميكالىق جوبالار جۇزەگە اسىرىلۋدا. رەسەي وزبەكستان ەكونوميكاسىنداعى ماڭىزدى ينۆەستورلاردىڭ ءبىرى بولىپ قالا بەرەدى»، – دەدى پۋتين.
ونىڭ ايتۋىنشا، رەسەي وزبەكستان ەكونوميكاسىنداعى ەلەۋلى ينۆەستور مارتەبەسىن ساقتاپ وتىر.
