اقمولا وبلىسىندا جەڭىستىڭ 81 جىلدىعىنا ارنالعان تاعىلىمدى شارالار ءوتىپ، بەيبىت ءومىر ءۇشىن جانىن قيعان بوزداقتاردىڭ رۋحىنا تاعزىم جاسالدى. كوكشەتاۋداعى «ماڭگىلىك الاۋ» مەموريالى ماڭىنا جينالعان وبلىس باسشىلىعى، دەپۋتاتتار، قۇقىق قورعاۋ ورگاندارىنىڭ وكىلدەرى مەن جۇزدەگەن تۇرعىن مايدانگەرلەردى ەسكە الىپ، ولاردىڭ ەرلىگىنە قۇرمەت كورسەتتى.
سالتاناتتى شارانىڭ ەرەكشە اسەرلى وتۋىنە قازاقتىڭ قاھارمان ۇلى راقىمجان قوشقارباەۆقا ارنالعان اندەر سەبەپ بولدى. رەيحستاگقا العاشقىلاردىڭ ءبىرى بولىپ جەڭىس تۋىن تىككەن باتىرعا ارنالعان پاتريوتتىق شىعارمالار جيىلعان جۇرتتىڭ رۋحىن كوتەرىپ، مەرەكەلىك جيىنعا ايرىقشا ءمان بەردى.
ءراسىم ءبىر مينۋت ۇنسىزدىكپەن جالعاسىپ، سوعىستا قازا تاپقان جاۋىنگەرلەردىڭ رۋحى ەسكە الىندى. كەيىن قارۋدان وق اتىلىپ، وتان قورعاۋشىلارعا دەگەن ماڭگىلىك قۇرمەت كورسەتىلدى. اقمولا وبلىسىنىڭ اكىمى مارات احمەتجانوۆ دەپۋتاتتارمەن، كۇشتىك قۇرىلىمداردىڭ باسشىلارىمەن جانە اسكەري قىزمەتكەرلەرمەن بىرگە «ماڭگىلىك الاۋعا» گۇل شوقتارىن قويدى.
تاعزىم راسىمىنەن كەيىن قاتىسۋشىلار وزگە دە تاريحي ورىندارعا بارىپ، قۇرمەت كورسەتتى. گۇل شوقتارى «جۇلدىز» مەموريالىنا، اتى اڭىزعا اينالعان ۇشقىش تالعات بيگەلدينوۆتىڭ ەسكەرتكىشىنە جانە كەڭەس وداعىنىڭ باتىرى مالىك عابدۋلليننىڭ مونۋمەنتىنە قويىلدى.
وبلىستىق ارداگەرلەر كەڭەسىنىڭ توراعاسى ەرمەك نۇعىمانوۆ بۇل كۇننىڭ ماڭىزدىلىعى ۇرپاقتار ساباقتاستىعىمەن ولشەنەتىنىن اتاپ ءوتتى.
ء«بىز ءۇشىن ەڭ باستىسى – سول سوعىستىڭ تاريحى ۇمىتىلماي، حالىق جادىندا ساقتالۋى. بۇگىن الاڭدا جاستاردىڭ، ستۋدەنتتەر مەن وقۋشىلاردىڭ كوپ بولۋى – سونىڭ دالەلى. بۇل – باتىرلار ەرلىگى كەيىنگى ۇرپاققا امانات بولىپ جەتىپ جاتقانىن كورسەتەدى. بارشا قازاقستاندىقتارعا بەيبىت اسپان مەن ەلىمىزگە وركەندەۋ تىلەيمىن»، – دەدى ول.
مەرەكەلىك كوڭىل كۇيدى مازمۇندى مادەني باعدارلاما تولىقتىردى. «جاعالاۋ» جاعالاۋىندا قالا تۇرعىندارى مەن قوناقتارى ءۇشىن ارنايى تاقىرىپتىق الاڭدار ۇيىمداستىرىلىپ، شىعارماشىلىق ۇجىمداردىڭ ونەرى ۇسىنىلدى. سوعىس جىلدارىنداعى اندەر شىرقالىپ، حور ۇجىمدارى پاتريوتتىق شىعارمالار ورىندادى. سونىمەن قاتار وبلىستىق مۋزەيدىڭ كوشپەلى كورمەلەرى، اسكەري شاتىرلار مەن دەرەكتى فيلم كورسەتىلىمدەرى كوپشىلىك نازارىنا ۇسىنىلدى.
مەرەكەنىڭ شارىقتاۋ شەگى «جاعالاۋ» ساحناسىندا وتكەن اۋقىمدى كونتسەرتتىك باعدارلاماعا ۇلاستى. وندا ونەرپازدار مەن قالا تۇرعىندارى ءبىر الاڭدا باس قوسىپ، باتىرلار رۋحىنا تاعزىم ەتىپ، جەڭىس جولىندا جانىن قيعان جاندارعا دەگەن العىستارىن ءبىلدىردى.
