قازاقستاندا ۇلى وتان سوعىسىنىڭ كوزى ءتىرى 57 ارداگەرى تۇرادى، دەپ حابارلايدى “ادىرنا” ۇلتتىق پورتالى Tengrinews.kz-كە سىلتەپ.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، جەڭىستىڭ 81 جىلدىعىنا وراي بارلىق وڭىردە سوعىس ارداگەرلەرىنە 5 ميلليون تەڭگەدەن بىرجولعى تولەم جاسالعان.
ۆەدومستۆو دەرەگىنە سايكەس، كەيىنگى بەس جىلدا مايدانگەرلەر سانى ايتارلىقتاي ازايعان. ماسەلەن، 2022 جىلعى 1 مامىرداعى جاعداي بويىنشا ەلدە 381 سوعىس ارداگەرى بولسا، بيىل ولاردىڭ سانى 57-گە جەتكەن.
سونىمەن قاتار، قازاقستاندا بۇگىندە 31 349 تىل ەڭبەككەرى تۇرادى. سونداي-اق مينيسترلىك سوعىس ارداگەرلەرىنە تەڭەستىرىلگەن ازاماتتار تۋرالى مالىمەت بەردى. ولاردىڭ قاتارىندا لەنينگراد قورشاۋىندا بولعاندار، كونتسلاگەرلەردىڭ بۇرىنعى تۇتقىندارى، چەرنوبىل اپاتىنىڭ زاردابىن جويۋعا قاتىسقاندار جانە اسكەري قاقتىعىستار كەزىندە جاراقات العان ازاماتتار بار.
مينيسترلىك ارداگەرلەرگە ارنايى مەملەكەتتىك جاردەماقى، مەديتسينالىق كومەك، تۇرعىن ۇيمەن قامتاماسىز ەتۋ، قوعامدىق كولىكتەگى جەڭىلدىكتەر جانە وزگە دە الەۋمەتتىك قولداۋ شارالارى قاراستىرىلعانىن مالىمدەدى.
