وسكەمەن قالاسىنداعى مەتاللۋرگيالىق الاڭدا ورىن العان وندىرىستىك جازاتايىم وقيعا سالدارىنان اۋىر جاراقات العان كازتسينك قىزمەتكەرلەرىنىڭ ءبىرى اۋرۋحانادا كوز جۇمدى، دەپ حابارلايدى "ادىرنا" ۇلتتىق پورتالى.
كومپانيا وكىلدەرىنىڭ مالىمەتىنشە، قازا بولعان قىزمەتكەردىڭ وتباسىنا جانە زارداپ شەككەن بارلىق جۇمىسشىلارعا قاجەتتى قولداۋ كورسەتىلمەك.
اپات سالدارىن جويۋ جۇمىستارى جالعاسىپ جاتقانى حابارلاندى. وقيعاعا بايلانىستى مەملەكەتتىك ورگاندارمەن بىرلەسكەن تەرگەۋ جۇرگىزىلىپ جاتىر. قازىرگى ۋاقىتتا كاسىپورىننىڭ مىرىش جانە قورعاسىن زاۋىتتارىنداعى وندىرىستىك قۋاتتار ۋاقىتشا تومەندەتىلگەن رەجيمدە جۇمىس ىستەۋدە.
ەسكە سالايىق، 5 مامىر كۇنى «كازتسينك» كاسىپورنىندا ءتۇتىن سورعىش قۇرىلعىنى تازالاۋ كەزىندە جارىلىس بولىپ، ارتىنشا ءورت شىققان جانە وندىرىستىك قۇرىلىمداردىڭ ءبىر بولىگى وپىرىلعان. وقيعا سالدارىنان باستاپقىدا ەكى ادام قازا تاۋىپ، بىرنەشە جۇمىسشى جاراقات العان.
