پاكىستاننىڭ بەلۋدجيستان پروۆينتسياسىندا قاۋىپسىزدىك كۇشتەرىنىڭ قىزمەتكەرلەرى مەن ولاردىڭ وتباسىلارىن تاسىمالداپ بارا جاتقان پويىزدا جارىلىس بولدى، دەپ حابارلايدى «ادىرنا» ءتىلشىسى Reuters اگەنتتىگىنە سىلتەمە جاساپ.
باق مالىمەتىنشە، كەمىندە 24 ادام قازا تاۋىپ، تاعى 70-كە جۋىق ادام جاراقات العان.
جەلىدە جاريالانعان بەينەجازبالاردا پويىزدىڭ ەكى ۆاگونى اۋدارىلىپ، ورتەنىپ كەتكەنى كورىنەدى. سونداي-اق جاقىن ماڭدا تۇرعان كولىكتەر دە زاقىمدانعان. ء«ال-دجازيرا» ءتىلشىسىنىڭ حابارلاۋىنشا، تەمىرجول ماڭىندا ورنالاسقان بىرنەشە ءۇي مەن عيمارات تا قاتتى بۇلىنگەن.
كۆەتتا قالاسىنداعى مەملەكەتتىك اۋرۋحانالاردا توتەنشە جاعداي جاريالاندى.
جارىلىسقا جاۋاپكەرشىلىكتى «بەلۋدجيستاندى ازات ەتۋ ارمياسى» سەپاراتيستىك توبى ءوز موينىنا العان. AP اگەنتتىگىنىڭ مالىمەتىنشە، جانكەشتى-لاڭكەس جارىلعىش زات ورناتىلعان كولىكتى پويىز كۆەتتا قالاسى ارقىلى ءوتىپ بارا جاتقان كەزدە تەمىرجول ماڭىندا جارىپ جىبەرگەن.
پرەمەر-مينيستر شاحباز شاريف بۇل شابۋىلدى قاتاڭ ايىپتاپ، ونى «قورقاق تەرروريستىك ارەكەت» دەپ اتادى جانە قۇربانداردىڭ وتباسىلارىنا كوڭىل ايتتى.
اۋعانستان جانە يرانمەن شەكتەسەتىن بەلۋدجيستان — پاكىستانداعى اۋماعى ەڭ ۇلكەن، بىراق ەڭ كەدەي پروۆينتسيا. «بەلۋدجيستاندى ازات ەتۋ ارمياسى» ءوڭىردىڭ تاۋەلسىزدىگى ءۇشىن كۇرەس جۇرگىزىپ كەلەدى. بۇل توپ اقش، ۇلىبريتانيا جانە ەۋرووداق ەلدەرىن قوسا العاندا بىرقاتار مەملەكەتتە تەرروريستىك ۇيىم رەتىندە تانىلعان.
