گەرمانيانىڭ رەينلاند-پفالتس جەرىندە جولاۋشىلار پويىزى جۇك كولىگىمەن سوقتىعىسىپ، ءىرى جول اپاتى بولدى، دەپ حابارلايدى "ادىرنا" ۇلتتىق پورتالى.
وقيعا 23 ناۋرىز كۇنى كەشكە ينسحايم قالاسى ماڭىنداعى تەمىرجول وتكەلىندە ورىن العان.
Deutsche Bahn كومپانياسىنا تيەسىلى RB53 باعىتىنداعى ايماقتىق پويىز فرانتسيانىڭ ۆيسامبۋر قالاسىنان گەرمانيانىڭ نويشتادت قالاسىنا باعىت العان.
جۇك كولىگى كەپتەلىستە باياۋ قوزعالىپ، تەمىرجول وتكەلىندە توقتاپ قالعان. سول ساتتە جاقىنداپ كەلگەن پويىز ءماشينيسى شۇعىل تەجەگىشتى باسقانىمەن، سوقتىعىستىڭ الدىن الۋ مۇمكىن بولماعان.
سوقتىعىس سالدارىنان جارىلىس بولىپ، ءورت شىققان. جۇك كولىگىنىڭ جۇرگىزۋشىسى اۋىر جاراقات الدى. ودان بولەك، جولاۋشىلار اۋرۋحاناعا جەتكىزىلگەن.
كۋاگەرلەردىڭ ايتۋىنشا، جەرگىلىكتى تۇرعىنداردىڭ ءبىرى ءورتتى سوندىرمەك بولعانىمەن، جالىن تىم كۇشتى بولعان. ول زارداپ شەككەن جۇرگىزۋشىگە العاشقى مەديتسينالىق كومەك كورسەتكەن.
الدىن الا ەسەپ بويىنشا، اپاتتان كەلگەن شىعىن بىرنەشە ءجۇز مىڭ ەۋرونى قۇراۋى مۇمكىن.
