«قازاقستان تەمىر جولى» ۇلتتىق كومپانياسىنىڭ باسقارما توراعاسى تالعات الدىبەرگەنوۆ «استاناترانسەكسپرەسس» جشس-ءنىڭ قۇرىلتايشىسى ەكەنىن راستادى، دەپ حابارلايدى "ادىرنا" ۇلتتىق پورتالى.
بۇل تۋرالى ول ۇكىمەتتە وتكەن بريفينگ بارىسىندا جۋرناليستەردىڭ سۇراقتارىنا جاۋاپ بەرۋ كەزىندە مالىمدەدى.
ونىڭ ايتۋىنشا، اتالعان كومپانيا سەنىمگەرلىك باسقارۋعا بەرىلگەن جانە قازىرگى ۋاقىتتا «قازاقستان تەمىر جولىمەن» دە، مەملەكەتتىك قۇرىلىمدارمەن دە ەشقانداي ىسكەرلىك بايلانىسى جوق.
«بۇل كومپانيانىڭ قۇرىلتايشىسى ەكەنىم راس. ول مەملەكەتتىك قىزمەت تۋرالى زاڭ تالاپتارىنا سايكەس باسقارۋعا تاپسىرىلعان. بۇگىندە كومپانيا قتج-مەن دە، مەملەكەتپەن دە جۇمىس ىستەمەيدى. سوندىقتان بۇل جەردە مۇددەلەر قاقتىعىسى جوق، بارلىق ءراسىم زاڭناماعا سايكەس ورىندالعان»، – دەدى تالعات الدىبەرگەنوۆ.
سونداي-اق جۋرناليستەر كومپانيا قىزمەتىن جالعاستىرىپ جاتقانى جانە ودان تابىس الىپ وتىرعان-وتىرماعانى جونىندە سۇراق قويعان. بۇعان جاۋاپ رەتىندە قتج باسشىسى بيزنەستى ءوزى باسقارمايتىنىن ايتىپ، بارلىق قارجىلىق جانە باسقارۋشىلىق ماسەلەلەرمەن سەنىمگەرلىك باسقارۋشى كومپانيا اينالىساتىنىن جەتكىزدى.
اشىق دەرەككوزدەردەگى مالىمەتكە سايكەس، «استاناترانسەكسپرەسس» جشس استانا قالاسىندا تىركەلگەن جانە جۇك تاسىمالى مەن كولىك-لوگيستيكالىق قىزمەتتەردى ۇسىناتىن ەكسپەديتورلىق ۇيىم بولىپ سانالادى.
