بەيسەنبىگە قاراعان ءتۇنى رەسەي كيەۆكە دروندار مەن زىمىراندار ارقىلى ارالاس سوققى جاسادى، دەپ حابارلايدى «ادىرنا» ءتىلشىسى BBC-گە سىلتەمە جاساپ.
ۋكراينا استاناسىنىڭ دارنيتسا اۋدانىندا كوپقاباتتى تۇرعىن ءۇيدىڭ ءبىر بولىگى قيراعان. بيلىك وكىلدەر ءۇيىندى استىندا ادامدار قالىپ قويۋى مۇمكىن ەكەنىن جەتكىزدى. رەسمي دەرەك بويىنشا، سوققى سالدارىنان كەمىندە ءبىر ادام قازا تاۋىپ، 32 ادام جارالانعان.
«قازىرگى ۋاقىتتا ستاتسيونارلاردا 20 ادام ەم قابىلداپ جاتىر. ولاردىڭ ىشىندە ءبىر بالا بار»،- دەلىنگەن حابارلامادا.
تۇنگى اتقىلاۋ 13 مامىردا ۋكرايناعا جاسالعان ەڭ ءىرى درون شابۋىلدارىنىڭ بىرىنەن كەيىن بولعان. ءبىر كۇن ىشىندە رەسەي اسكەرى شامامەن 900 درون قولدانعان، ەلدىڭ بىرنەشە ايماعىندا كەمىندە التى ادام قازا تاپقان.
تۇندە اۋە كۇشتەرىنىڭ Telegram-ارناسىندا كيەۆ پەن كيەۆ وبلىسى، سونداي-اق چەركاسسى ماڭى مەن پولتاۆا وبلىسى باعىتىندا كوپتەگەن زىمىراندار مەن دروندار ۇشىپ بارا جاتقانى تۋرالى حابارلامالار پايدا بولدى. سونىمەن قاتار ۋكراينا استاناسىنا بالليستيكالىق زىمىراندارمەن سوققى جاسالعانى، قاتتى جارىلىستار ەستىلگەنى ايتىلدى.
كەيىن كيەۆتە زىمىران سىنىقتارىنىڭ قۇلاعانى، سونىڭ ىشىندە تۇرعىن ۇيلەردە ءورت شىققانى جانە قيراۋلار بولعانى تۋرالى اقپاراتتار تۇسە باستادى.
كيەۆ مەرى ۆيتالي كليچكونىڭ ايتۋىنشا، وقيعا ورنىندا قۇتقارۋ جانە ىزدەستىرۋ جۇمىستارى جالعاسىپ جاتىر.
