قىتاي مەن اقش جاھاندىق سىن-قاتەرلەرگە جاۋاپ بەرۋ جانە ەكىجاقتى ىنتىماقتاستىقتىڭ قاۋىپسىز ارحيتەكتۋراسىن قالىپتاستىرۋ ءۇشىن كۇش بىرىكتىرۋى ءتيىس. بۇل تۋرالى قحر توراعاسى سي تسزينپين اقش پرەزيدەنتى دونالد ترامپپەن كەلىسسوزدەر بارىسىندا مالىمدەدى، دەپ حابارلادى «ادىرنا» ءتىلشىسى تاسس-قا سىلتەمە جاساپ.
«ەكى ەل «فۋكيديد تۇزاعىنان» ءوتىپ، ءىرى دەرجاۆالار اراسىنداعى قاتىناستاردىڭ جاڭا پاراديگماسىن اشا الا ما؟ ولار بىرگە جاھاندىق سىن-قاتەرلەرگە قارسى تۇرىپ، الەمگە كوبىرەك تۇراقتىلىق اكەلە الا ما؟ <…> بۇل — تاريحتىڭ، بەيبىتشىلىكتىڭ جانە حالىقتاردىڭ ماسەلەسى، سونداي-اق ءداۋىردىڭ تالابى، وعان ۇلى دەرجاۆالاردىڭ كوشباسشىلارى بىرلەسىپ جاۋاپ بەرۋى ءتيىس»، — دەپ اتاپ ءوتتى قىتاي باسشىسى.
ونىڭ ايتۋىنشا، جاھاندىق وزگەرىستەردىڭ ۇدەۋى جاعدايىندا حالىقارالىق قاۋىمداستىق قايتادان تاريحي بەتبۇرىس كەزەڭىنە تاپ بولىپ وتىر. پرەزيدەنت قىتاي مەن اقش-تىڭ ورتاق مۇددەلەرى قايشىلىقتاردان باسىم ەكەنىن، ال ءبىر تاراپتىڭ جەتىستىگى ەكىنشى تاراپ ءۇشىن دە مۇمكىندىك ەكەنىن قوستى.
«تۇراقتى قىتاي–اقش قاتىناستارى الەم ءۇشىن ءتيىمدى»، — دەدى قىتاي باسشىسى.
فۋكيديد تۇزاعى - امەريكاندىق ساياساتتانۋشى گرەحام الليسون تانىمال ەتكەن تەرمين. ول جاڭادان كۇشەيىپ كەلە جاتقان دەرجاۆانىڭ بششۇرىننان كەلە جاتقان ۇلى دەرجاۆانى حالىقارالىق گەگەمون رەتىندە ىعىستىرۋ قاۋپى تۋىنداعان كەزدەگى سوعىسقا بەيىمدىلىك تەندەنتسياسىن سيپاتتايدى.
ايتا كەتەيىك، ترامپ 13 مامىردا جۇمىس ساپارىمەن بەيجىڭگە بارعان ەدى. 15 مامىردا كوشباسشىلار بەيرەسمي كەلىسسوزدەر جۇرگىزبەك. بۇل – ترامپتىڭ 2017 جىلدىڭ قاراشاسىنان بەرگى قىتايعا جاساعان العاشقى ساپارى.
