14 مامىردا قازاق كينو ونەرىنىڭ كورنەكتى وكىلى، قازاق كسر حالىق ءارتىسى نۇرجۇمان ىقتىمباەۆ 85 جاسقا تولدى، دەپ حابارلايدى "ادىرنا" ۇلتتىق پورتالى.
جارتى عاسىردان استام ۋاقىتىن كينو سالاسىنا ارناعان اكتەر ۇلتتىق كينەماتوگرافيانىڭ دامۋىنا ولشەۋسىز ۇلەس قوسىپ، قازاق ونەرىنىڭ تاريحىندا وزىندىك ءىز قالدىردى.
نۇرجۇمان ىقتىمباەۆ الماتى وبلىسى كەربۇلاق اۋدانىنداعى التىنەمەل وڭىرىندە دۇنيەگە كەلگەن. بالا كەزىنەن حالىق اۋىز ادەبيەتىنە جاقىن بولىپ وسكەن ول «الپامىس»، «قوبىلاندى»، «قىز جىبەك» سەكىلدى جىر-داستانداردى جاتقا ايتىپ، اۋىل اراسىنداعى ونەر كەشتەرىنە قاتىسقان.
1957 جىلى الماتىعا كەلىپ، حورەوگرافيالىق ۋچيليششەگە تۇسكەن. ول قازاق ونەرىنىڭ بەلگىلى وكىلدەرى عاريفوللا قۇرمانعاليەۆ پەن ۇلىقپان قۇبىشەۆ ۇستازداردان ءتالىم الدى.
اكتەردىڭ كينو الەمىنە كەلۋىنە سارا جوراباەۆا ىقپال ەتكەن. كەيىن ابدوللا قارساقباەۆ تۇسىرگەن قيلى كەزەڭ ءفيلمى ارقىلى ونىڭ كينوداعى جولى باستالدى.
نۇرجۇمان ىقتىمباەۆ "اتاماننىڭ اقىرى", "مانشۇك تۋرالى جىر", "نان ءدامى", "كوكسەرەك", "بالالىق شاققا ساياحات" سەكىلدى تۋىندىلارداعى رولدەرى ارقىلى كەڭىنەن تانىلدى. «نان ءدامى» فيلمىندەگى ءرولى ءۇشىن كسرو مەملەكەتتىك سىيلىعىن يەلەنىپ، قازاق اكتەرلەرى اراسىنداعى بەدەلدى ماراپات يەلەرىنىڭ بىرىنە اينالدى.
ونەر يەسى حالىقارالىق كينو جوبالارىنا دا قاتىسىپ، جەرار دەپاردە مەن كەري-حيرويۋكي تاگاۆا سەكىلدى الەمدىك دەڭگەيدەگى اكتەرلەرمەن بىرگە جۇمىس ىستەدى. ول گولليۆۋد جوبالارىنا قاتىسقان العاشقى قازاق اكتەرلەرىنىڭ ءبىرى رەتىندە اتالادى.
