قىرعىزستاندىق MMA سپورتشى مەدەت جەەناليەۆ ىستىقكولدە سۋعا باتىپ بارا جاتقان قىزدى قۇتقارامىن دەپ، قازا تاپتى. قايعىلى وقيعا 12 مامىر كۇنى بولعان. بۇل تۋرالى kaktus.media باسىلىمى جاريالادى، دەپ حابارلايدى “ادىرنا”.
30 جاستاعى سپورتشى كولدە دەمالىپ جۇرگەن كەزدە بيىك تولقىنعا تاپ بولعان ەكى وقۋشى قىزدىڭ باتىپ بارا جاتقانىن بايقايدى. مەدەت دوسىمەن بىرگە بىردەن سۋعا سەكىرىپ، قىزداردى امان الىپ قالادى. الايدا ءوزى جاعالاۋعا جەتە الماي، سۋ استىندا قالىپ قويعان.
«تەكسەرۋ بارىسىندا كامەلەتكە تولماعان ءتورت قىزدىڭ كولدە دەمالعان جانە ولاردىڭ ءبىرى شومىلۋ كەزىندە سۋعا اعىپ كەتكەنى انىقتالدى. م.ج. ەسىمدى ازامات ونى قۇتقارعانىمەن، ءوزى سۋدان شىعا الماي قالعان. قۇتقارۋشىلار ونىڭ ءمايىتىن كەلەسى كۇنى تاڭەرتەڭ عانا سۋ استىنان الىپ شىقتى»، - دەلىنگەن باسىلىم تاراتقان اقپاراتتا.
مەدەت جەەناليەۆ 2017-2019 جىلدارى MMA سپورتىندا كاسىبي تۇردە ونەر كورسەتكەن. ول وكتاگوندا ءتورت جەكپە-جەك وتكىزىپ، ەكى مارتە جەڭىسكە جەتكەن.
